Kitchen Jugaad | How to clean burnt cooker: कुकरचा वापर घरोघरी केला जातो. रोजच्या वापरात असलेला हा कुकर आपण रोज स्वच्छ करतो पण तरीही अनेकदा बाहेरून आणि आतून तो काळपट पडू लागतो. नव्या कुकरची काळजी अगदी वापरण्यापासून ते धुण्यापर्यंत आपण घेत असतो. घड्याळावर चाललेल्या आपल्या या आयुष्यात जेवणाची कामे पटापट व्हावीत म्हणून अनेकदा कुकरचा वापर होत असूनही त्याच्या स्वच्छतेकडे नकळतपणे दुर्लक्ष होऊ लागतं आणि त्याचा परिणाम म्हणजे काळवंडलेला कुकर.
कुकरचा काळपटपणा घालवण्यासाठी आणि तो स्वच्छ, चकाकणारा दिसण्यासाठी काही सोप्पे उपाय आहेत ते केल्यानंतर तुम्ही वापरत असलेला कुकर अगदी नवा-कोरा दिसू लागेल, यात शंका नाही.
कुकर स्वच्छ करण्यासाठीचे हे ३ घरगुती उपाय: (Home remedies to Clean Cooker)
१. लिंबू (Lemon)
अनेकदा कुकर बाहेरून तर स्वच्छ चकाकणारा असतो पण आतून तो अगदी काळपट पडलेला असतो. यासाठी आपल्या किचनमध्ये रोज वापरात असलेला लिंबू कामी येतो. लिंबूच्या मदतीने हा उपाय करण्यासाठी जेव्हा तुम्ही कुकरमध्ये डाळ-भात लावाल, तेव्हा आधी तळाशी पाणी टाकल्यानंतर त्या पाण्यात लिंबाच्या १-२फोडी टाकून ठेवा. यामुळे कुकर आतल्या बाजूने अजिबात काळा पडणार नाही.
हेही वाचा… पचनक्रिया सुधारण्यासाठी जेवणानंतर करा ‘या’ १० हस्त मुद्रा; आरोग्यासाठी ठरतील फायदेशीर
२. मक्याचे पीठ (Corn flour)
काळ्या पडलेल्या कुकरसाठी मक्याचं पीठचादेखील अगदी उत्तमप्रकारे वापर होतो. यासाठी आधी एका भांड्यात ३ चमचे मक्याचे पीठ आणि १ चमचा बेकिंग सोडा घ्या. यामध्ये एका लिंबाचा रस पिळा. त्यानंतर त्यात थोडं डिशवॉश लिक्विड घाला आणि त्याची पेस्ट तयार करा.
आता तयार झालेली ही पेस्ट कुकरला १० ते १५ मिनिटांसाठी लावून ठेवा. नंतर कुकरवर थोडं पाणी टाकून कुकर घासणीने घासून स्वच्छ करा. यामुळे कुकर अगदी छान चकाकेल.
हेही वाचा… पाण्याच्या टाकीत न उतरता चिखल, माती करा स्वच्छ; ‘हे’ तीन सोपे व स्वस्त उपाय वाचवतील पैसे
३. चिंच आणि मीठ (Tamarind and Salt)
काळा झालेला कुकर स्वच्छ करण्यासाठी या उपायाचाही खूप फायदा होऊ शकतो. या उपायासाठी एका वाटीत चिंचेचा कोळ घ्या आणि त्यात मीठ टाका. आता हे मिश्रण कुकरला लावा आणि घासणीने स्वच्छ करा. कुकरवरील काळे डाग, अस्वच्छपणा लगेच साफ होईल आणि तो नव्यासारखा चमकेल.
