कर वाचविण्यासाठी सोप्या टीप्स

कराची बचत करणाऱ्या जुन्या गुंतवणुकांमधून पैसे काढा आणि पुन्हा गुंतवणूक करा

कधीकधी तुम्हाला अधिक पैसे गुंतवायची गरज नसते. तुमच्या ज्या कर वाचविणाऱ्या जुन्या गुंतवणुकांचा लॉक-इन कालावधी संपलेला असेल, त्या काढून घेऊन कराची बचत करण्यासाठी पुन्हा गुंतवणूक करा. पीपीएफसारख्या योजनांमुळे गुंतवणूक केल्यापासून सात वर्षे पूर्ण केल्यानंतर त्यातील काही रक्कम काढण्याची परवानगी असते. दुसरीकडे कर वाचविणाऱ्या ईएलएसएससाठी तीन वर्षांचा लॉक-इन कालावधी असतो, ज्यातून त्यानंतर संपूर्णपणे किंवा काही अंशी पैसे काढून पुन्हा गुंतवणूक केली जाऊ शकते. प्री-स्कूल फीवरील वजावट, कलम ८० (सी) अंतर्गत. हे शाळेत भरलेल्या फीवरील वजावट म्हणून ओळखले जात नाही. शिशू वर्गासाठीची फी म्हणजेच प्री-नर्सरी आणि नर्सरीसाठीची फी कलम ८० (सी) अंतर्गत वजावटीस पात्र असते. परंतु ह्याचे लाभ फक्त दोनच मुलांपर्यंत मर्यादित असतात. म्हणून आईवडिलांपैकी प्रत्येक जण दोन मुलांसाठी भरलेल्या फीसाठी वजावटीवर दावा करू शकतात.

आईवडिलांच्या मदतीने कर वाचविणे

जर तुमचे आईवडील ज्येष्ठ नागरिक असतील तर, तुम्ही तुमचे पैसे त्यांच्या मुदतठेव खात्यात हस्तांतिरत करू शकता आणि एका आर्थिक वर्षात त्यांच्या प्रत्येक खात्यासाठी आणि ५०००० रुपयांपर्यंत करमुक्त व्याज मिळवू शकता. तुमचे आईवडीलही अशी हस्तांतरित केलेली रक्कम आकर्षक व्याजदर प्राप्त करण्यासाठी कलम ८० (सी) अंतर्गत कराच्या वजावटीसाठी पात्र असलेल्या एससीएसएस सारख्या इतर योजनांमध्ये वळवू शकतात. तुम्ही जर कर्ज काढून घर विकत घेत असलात आणि त्यासाठीचे काही/संपूर्ण पैसे जर तुमच्या आईवडिलांकडून उसने घेत असलात, तर तुमच्या आईवडिलांना द्याव्या लागणाऱ्या व्याजाच्या पैशाची वजावट तुम्ही कलम २४बी अंतर्गत मागू शकता. परंतु पुरावा म्हणून तुमच्या आईवडिलांकडून योग्य ते व्याजाचे प्रमाणपत्र घ्या.
तुम्ही जर तुमच्या आईवडिलाच्या मालकीच्या घरात राहत असलात, तर तुमचा कराचा बोजा कमी करण्यासाठी तुम्ही त्यांना भाडे देऊन घरभाडे भत्ता दावा करू शकता. यासाठी आयकर विभागाने छाननी केल्यास त्रास होऊ नये म्हणून तुम्ही यथायोग्य भाडेकरार करण्याची गरज असते आणि तुमच्या आईवडिलांकडून भाडेपावत्या घेतल्या पाहिजेत.

ज्येष्ठ नागरिक असलेल्या आईवडिलांसाठी केलेले प्रिमिअमचे पेमेंट

सरत्या काळाबरोबर वैद्यकीय खर्च वाढतच असतात आणि हे खर्च भागवण्यासाठी तुमच्याकडे वैद्यकीय विमा असलाच पाहिजे, विशेषत: ज्येष्ठ नागरिकांच्या बाबतीत. तुम्ही जर त्यांच्या आरोग्यविम्यासाठी प्रिमिअम भरत असलात, तर तुम्ही ५०,००० रुपयांची वजावट कलम ८० (डी) अंतर्गत दावा करू शकता. जर ज्येष्ठ नागरिकाने त्याच्यापेक्षाही ज्येष्ठ नागरिकासाठी प्रिमिअम भरल्यास त्याला/तिला ५०,००० रुपयांची अतिरिक्त वजावट मिळू शकते. याव्यतिरिक्त, तुम्ही जर तुमच्या ज्येष्ठ नागरिक असलेल्या आईवडिलांसाठी वैद्यकीय खर्च करीत असलात तर तुम्ही कलम ८० (डी) अंतर्गत ५०,००० रुपयांची वजावट प्राप्त करू शकता. परंतु या बाबतीतील कराचा लाभ हा फक्त हे खर्च आरोग्यविम्यात समाविष्ट नसले तरच मिळतो. पुरावा म्हणून सादर करण्यासाठी सर्व बिले आणि प्रिस्क्रिप्शन्स सांभाळून ठेवा.
आदिल शेट्टी सीईओ, बँकबझार