Maruti Suzuki Baleno चे फेसलिफ्ट व्हर्जन सध्या जोरदार चर्चेत आहे. टेस्टींगच्या दरम्यानही ही कार समोर आली होती. नुकत्याच आलेल्या रिपोर्टसनुसार, ही कार जानेवारीच्या शेवटच्या आठवड्यात बाजारात दाखल होणार आहे. या कारचे बुकींग सुरु झाल्याचेही कंपनीने सांगितले आहे. ११ हजारांपासून २१ हजार रुपयांपर्यंत भरुन या कारचे बुकींग करता येणार आहे. फेब्रुवारीपासून ग्राहकांना या कारची प्रत्यक्ष डिलिव्हरी केली जाईल. टेस्टींग दरम्यान या कारची काही छायाचित्रे लीक झाली होती. ग्राहकांना यातील दुसऱ्यांदा डिझाईन करण्यात आलेले मॉडेल मिळणार आहे.
नव्या बलेनोमध्ये बेसिक वेरियंटमध्येच प्रोजेक्टर हेडलॅम्प असण्याची शक्यता आहे. आता हे फिचर केवळ अल्फा वेरियंटमध्येच मिळते. या नव्या फेसलिफ्ट बलेनोच्या इंटेरियरमध्ये काही नवीन फिचर्स मिळणार आहेत. मेकॅनिकली या कारमध्ये आधीच्या कारपेक्षा कोणतेही बदल करण्यात आलेले नाहीत असेही कंपनीने सांगितले आहे. आताप्रमाणेच ही कार पेट्रोल आणि डिझेल अशा दोन्ही इंजिनांमध्ये असेल. यामध्ये १.२ लीटरचे पेट्रोल इंजिन असून ते ८३ bhp ची पॉवर आणि ११५ Nm टॉर्क तयार करतो. १.३ लीटरचे डिझेल इंजिन असून ते ७४ bhp पॉवर आणि १९० Nm टॉर्क तयार करतो. आताच्या बलेनोपेक्षा या नव्या मॉडेलची किंमत २५ ते ३० हजारांनी जास्त असण्याची शक्यता आहे.
