सतत चक्कर येणे असू शकते Brain Tumor चे लक्षण; आजाराच्या सुरुवातीला शरीर देते ‘हे’ संकेत

मायग्रेनची वेदना आणि ब्रेन ट्यूमरची वेदना ओळखणे कठीण आहे. दोघांची लक्षणेही जवळपास सारखीच आहेत, पण ब्रेन ट्यूमरच्या बाबतीत, डोकेदुखीसाठी घेतलेले पेन किलर देखील आराम देऊ शकत नाहीत. बर्‍याच वेळा एखाद्या व्यक्तीला ब्रेन ट्यूमरमध्ये अचानक झटके येतात. अशी अनेक लक्षणे आहेत जी समजणे सोपे नाही. जाणून घेऊया ब्रेन ट्यूमरची सुरुवातीची लक्षणे कोणती आहेत.

मिठाच्या पाण्याने अंघोळ केल्यास दूर होईल ताण-तणाव; जाणून घ्या शरीराला होणारे इतर फायदे

ब्रेन ट्यूमर म्हणजे काय?

मेंदूतील पेशींची अनियंत्रित आणि असामान्य पद्धतीने वाढ होण्याला ब्रेन ट्यूमर म्हणतात. हे दोन प्रकारांमध्ये विभागलेले आहे – प्राथमिक आणि दुय्यम. प्राथमिक ट्यूमरमध्ये, मेंदूतील पेशी असाधारणपणे वाढतात आणि ब्रेन ट्यूमरला कारणीभूत ठरतात. दुसरीकडे, शरीराच्या इतर भागांतील असामान्य पेशी मेंदूमध्ये पसरल्यास, त्याला दुय्यम ट्यूमर म्हणतात. यामध्ये स्तन, फुफ्फुस, मूत्रपिंड आणि त्वचेचे कर्करोग सामान्यतः मेंदूमध्ये पसरतात.

ब्रेन ट्यूमरची सुरुवातीची लक्षणे

• ब्रेन ट्यूमरचे पहिले लक्षण म्हणजे डोकेदुखी. साधारणपणे वेदनाशामक औषधे घेतल्याने डोकेदुखी बरी होते, परंतु जर डोकेदुखी नियमितपणे होत असेल आणि औषधोपचार करूनही ती आटोक्यात येत नसेल, तर तुम्हाला ब्रेन ट्यूमर असू शकतो.
• ब्रेन ट्यूमरच्या सुरुवातीला तुम्हाला ऐकण्यातही अडचण येऊ शकते. तुम्हाला ऐकण्यात अडचण येत असेल तर तुमचा टेम्पोरल पार्ट प्रभावित होत आहे.
• ब्रेन ट्यूमरमध्ये, मेंदूमध्ये एक गाठ तयार होते, ज्यामुळे डोकेदुखी होते आणि नेहमी उलट्या झाल्यासारखे वाटते. कधीकधी उलट्या देखील होतात.
• या स्थितीत व्यक्तीला नेहमी चक्कर येते. तो कोणतेही काम नीट करू शकत नाही. विशेषत: पुढे झुकून कराव्या लागणाऱ्या कामात जास्त त्रास होतो.
• या दरम्यान मूड स्विंगची समस्या वाढते. माणसाच्या वागण्यात अनेक बदल होतात. त्याचा मूड क्षणाक्षणाला बदलतो.

(येथे देण्यात आलेली माहिती गृहीतके आणि सामान्य माहितीवर आधारित आहे. कृपया अधिक माहितीकरिता तज्ज्ञांचा सल्ला घ्या.)