फुटबॉल आणि धावण्यापेक्षा टेनिस, जलतरण आणि एरोबिक्स या खेळांमुळे दीर्घ आणि आरोग्यदायी आयुष्य मिळते, असे एका नव्या अभ्यासात आढळून आले आहे. ऑक्सफर्ड विद्यापीठाच्या संशोधकांनी केलेल्या अभ्यासानुसार, जे लोक रॅकेटशी संबंधित असणारे टेनिस, स्क्वॅश किंवा बॅटमिंटन खेळ खेळतात त्यांना हृदयरोग आणि आघात होण्याचा धोका ५६ टक्क्यांनी कमी असतो. जलतरणामुळे हृदयरोगाचा धोका ४१ टक्क्यांनी कमी होतो, तर एरोबिक्समुळे ३६ टक्के प्रमाण कमी होते. मात्र जे लोक फुटबॉल, धावणे आणि रग्बी यांसारखे व्यायाम करतात त्यांच्यामध्ये याचा कोणताही फायदा दिसून आला नाही. रॅकेट हा फक्त खेळ नसून त्यामुळे अतिरिक्त शारीरिक आणि मानसिक आरोग्याचे फायदे होतात, असे ऑक्सफर्ड विद्यापीठाच्या शारीरिक हालचाली आणि लोकसंख्या आरोग्यचे सहयोगी प्राध्यापक चार्ली फोस्टर यांनी म्हटले आहे. आम्ही तरुणांचा संघीय खेळ खेळणारा संघ आणि धावणारे खेळाडू यांचा अभ्यास केला. यामध्ये जास्त फरक दिसून आला नाही. यामध्ये जवळपास ८० हजार लोकांचा ९ वर्षे अभ्यास करण्यात आला आहे. त्यातून हा निष्कर्ष काढण्यात आला असल्याचे संशोधकांनी म्हटले आहे. हे संशोधन ब्रिटिश जर्नल ऑफ स्पोर्ट मेडिसिनमध्ये चालू आठवडय़ात प्रसिद्ध झाले आहे. (टीप : ‘आरोग्यवार्ता’मधील बातम्या या जगभरातील संशोधकांनी केलेल्या वैद्यकीय संशोधनावर आधारित असतात. त्यामुळे त्यातील मतांशी ‘लोकसत्ता’चा संबंध नाही. कोणताही वैद्यकीय उपचार करण्यापूर्वी आरोग्यतज्ज्ञांशी व डॉक्टरांशी सल्लामसलत करणे आवश्यक आहे.)
