मोकळे आकाश.. :  लोभ असावा..

एखादी गोष्ट आवडणे, हवीहवीशी वाटणे, ती फक्त आपल्यालाच मिळावी हा आग्रह निर्माण होणे, याचीच पुढची पायरी म्हणजे अमर्यादित मोह आणि लोभ. सीतेला कांचनमृगाच्या कातडय़ाच्या काचोळीचा मोह झाला. पण परस्त्रीचे हरण करण्याची रावणाची कृती ही मात्र अविवेकी लोभाची होती. भरताला राज्याभिषेक व्हावा या मोहाचे रूपांतर कैकयीच्या एकाधिकारशाही लोभात न होते तर श्रीरामाला चौदा वर्षांचा वनवास न भोगायला लागता. द्रौपदीच्या सहवासाचा लोभ कौरवांच्या पतनाला कारणीभूत ठरला. आपला शिष्योत्तमच एकमेव धनुर्धर ठरावा या लोभापायी द्रोणाचार्यानी जगावेगळी गुरुदक्षिणा मागितली. लोभ कधी स्त्रीसुखासाठी अतिरेक करता झाला, तर कधी सत्तेच्या विस्तारलालसेने मदांध झाला. आक्रमण करून इतर राज्यांची आणि राष्ट्रांची सीमा ओलांडून सीमारेषा पार करण्याची राक्षसी लालसा लोभातूनच निर्माण झाली.

आणखी वाचा

VIDEO: “विषय काळजाचा होता” पिल्लांना वाचवण्यासाठी बिबट्या मादी सिंहाला भिडली; शेवटी आईचं प्रेम जिंकलं की सिंहाची ताकद?

‘हिंदुत्व तोडणारा राक्षस’, कालीचरण यांच्या विधानानंतर मनोज जरांगे…

मनातलं कागदावर : स्वर्ग की नरक?

एलॉन मस्क यांच्या ‘स्टारलिंक’ला भारतीय अवकाश खुले; मात्र परवाना नियम-शर्तींच्या पूर्ततेनंतरच केंद्रीय मंत्र्यांचे प्रतिपादन

आजपासून ‘या’ ३ राशींची चांदी; केतूच्या नक्षत्र परिवर्तनाने कमावणार भरपूर पैसा आणि मानसन्मान

आकाशात उल्‍कावर्षावाचे मनोहारी दृश्‍य; सज्‍ज व्‍हा…

‘भय’भूती : …तर भयमुक्ती होईल

“तोंड रक्ताने माखलेली एक…”, दिव्या भारतीच्या निधनाबद्दल बॉलीवूड अभिनेत्रीचा मोठा खुलासा; तिला पडताना ‘या’ व्यक्तीने पाहिल्याचा केला दावा

लोभ ज्या मनात निर्माण होतो ते मनच त्याच्या निर्मिती आणि प्रकटीकरणास कारणीभूत ठरते. एखादी गोष्ट हवीहवीशी वाटणे ही भावना जेव्हा पराकोटीला जाते तेव्हा हव्यास निर्माण होतो. हाव ही त्याची पुढची पायरी. निसरडय़ावर पाय घसरला की माणूस लोभी बनतो आणि येनकेनप्रकारेण त्या गोष्टीची प्राप्ती हेच त्याचे एकमेव उद्दिष्ट उरते. लोभ मालकी हक्काच्या अग्नीला प्रज्ज्वलित करतो. ज्या गोष्टीचा लोभ सुटतो त्या गोष्टीवर माणसाला त्याचा एकटय़ाचा संपूर्ण, सर्वथव आणि सदासर्वदा अधिकार हवा असतो. ती दुसऱ्याबरोबर भागीदारीत नको असते. आपलाच विचार प्रबळ झाला की अप्पलपोटेपणा जन्म घेतो. लोभाने माणसाचे स्खलन होते, ते असे.

लोभाने विवेकाचा क्षय केला. मानवी मनाच्या सत्त्वशील, सुशील विचारांचा गळा घोटला. मर्यादांच्या लक्ष्मणरेषा पुसल्या आणि मदमत्त स्वैराचाराला आमंत्रण दिले. इथे पती-पत्नी नाती तुटली. भाऊबंदकीने भावाभावांचे प्रेम संपविले आणि मागे फक्त एक काळ्या रंगाचे भोक.. ‘ब्लॅक होल’ मागे ठेवले.

करोना संपल्यावर वैश्विक नव्या जगाची निर्मिती करण्याची संधी आपल्याला मिळेल. ‘बॅक टू बेसिक्स’ अशी ही काहीशी अवस्था असेल. हवेहवेसे वाटण्याच्या भावनेला किती हवा द्यायची याचा सारासार विचार आपण सर्वानी करायलाच हवा. तसेही आयुष्य अकल्पित आणि क्षणभंगुर असते. ‘आहे त्यात समाधान शोधा’ हा सर्वात मोठा धडा कोविड १९ व्हायरसने दिला आहे. त्याचा साकल्याने विचार आणि स्वीकार करण्याची गरज आहे.

तस्मात्.. लोभ असावा, लोभी नसावे.