जंगलात दडलेली रहस्ये..

सावंत यांनी दीर्घकवितेच्या सुरुवातीलाच म्हटले आहे की, ‘एखाद्या रंजक पुस्तकासारखी, पानोपानी उलगडत जातात, जंगलात दडलेली रहस्ये, यासाठी का होईना, वाचलं पाहिजे मनापासून, जंगलगाथेचं अवर्णनीय पुस्तक’ आणि जंगलगाथेच्या या पुस्तकाची पाने उलटत जाऊ तसे माणूस आणि निसर्ग यांच्या नात्याचे अनेक कंगोरे आपल्यासमोर उलगडत जातात. या नात्याला पडलेले तडे व्यक्त करताना कवी म्हणतो, ‘छळू लागलीय जंगलाला, दगडधोंडय़ांची राकट भाषा, पळू लागल्यात आभाळात, भरकटलेल्या क्षितिजरेषा.’ निसर्गाविषयीच्या ममत्वाची जाणीवच आताशा हरवू लागल्याचे कवी सूचित करतोच; परंतु शेवटी ‘कितीही तोडा, कसंही झोडा, पुन्हा रुजून येतंच, एक नवं हिरवंगार जंगल, निर्घृणपणे कापलेल्या चिवट खोडांतून’ असा आशावादही व्यक्त होतो. त्या आशावादासाठी तरी ही कविता वाचायलाच हवी!

‘जंगलगाथा’- रमेश सावंत,

संवेदना प्रकाशन,

पृष्ठे – ८८, मूल्य – १२५ रुपये.