सुशीलकुमारांच्या मालमत्तेत तिपटींनी वाढ

सोलापूर लोकसभा निवडणुकीतील काँग्रेसचे उमेदवार तथा केंद्रीय गृहमंत्री सुशीलकुमार शिंदे यांच्या मालमत्तेत पाच वर्षांनंतर जवळपास तिपटींनी वाढ होऊन ८ कोटी ६० लाखांची मालमत्ता तब्बल २३ कोटी ४७ लाखांची झाली आहे. मालमत्तेच्या वाढीतही कोटीच्या कोटी उड्डाणे शिंदे कुटुंबीयांनी मारल्याचे दिसून येते.
मागील २००९ साली शिंदे यांनी सोलापूर लोकसभा मतदारसंघातून निवडणूक लढविताना आपल्या कुटुंबीयांकडे ३ कोटी ३५ लाखांची जंगम मालमत्ता, तर ५ कोटी २५ लाख ५० हजारांची स्थावर अशी मिळून एकूण ८ कोटी ६० लाखांपर्यंत मालमत्ता असल्याचे प्रतिज्ञापत्राद्वारे जाहीर केले होते. परंतु गेल्या पाच वर्षांत केंद्रात प्रारंभी ऊर्जामंत्री व नंतर गृहमंत्रिपद सांभाळणाऱ्या शिंदे यांच्या मालमत्तेत लक्षणीय वाढ होऊन ती २३ कोटी ४७ लाखांची झाली आहे. यात ८ कोटी ५७ लाख ९९ हजारांची जंगम मालमत्ता असून, १४ कोटी ८९ लाखांची स्थावर मालमत्ता समाविष्ट आहे, असे त्यांनी प्रतिज्ञापत्रात नमूद केले आहे.