नरेंद्र मोदींच्या सभेसाठी पुण्यात झाडांची कत्तल, एसपी कॉलेजच्या आवारातील झाडांवर कुऱ्हाड

एसपी कॉलेजच्या मैदानात व्यासपीठ उभारण्याचं काम सुरु आहे. यावेळी अडथळा ठरणारी जवळपास १५ ते १६ झाडे कापण्यात आली आहेत. दरम्यान आयोजकांनी मात्र सुरक्षेच्या कारणास्तव झाडं कापण्यात आली असल्याचं सांगितलं आहे.

पंतप्रधान नरेंद्र मोदी गुरुवारी महाराष्ट्र दौऱ्यावर असतील. यावेळी परळीत त्यांची पहिली सभा पार पडणार आहे. भाजपा उमेदवार पंकजा मुंडे परळीतून निवडणूक लढत आहेत. यानंतर नरेंद्र मोदी साताऱ्यात जाणार आहे. साताऱ्यात लोकसभेची पोटनिवडणूक होणार असून भाजपाकडून उदयनराजे लढत आहेत. तर विधानसभेसाठी शिवेंद्रराजे यांना उमेदवारी देण्यात आली आहे. दोघांच्या प्रचारासाठी नरेंद्र मोदी सभा घेणार आहेत.

यानंतर नरेंद्र मोदींची संध्याकाळी साडेपाच वाजण्याच्या सुमारास पुण्यात सभा पार पडणार आहेत. एसपी कॉलेजच्या मैदानात ही सभा पार पडणार आहे. या सभेनंतर नरेंद्र मोदी पुन्हा दिल्लीला रवाना होतील. शुक्रवारी १८ तारखेला मुंबईत सभा घेत नरेंद्र मोदींच्या प्रचाराची सांगता करतील.