वाई : मांढरदेव (ता.वाई) येथून लग्नाचे वऱ्हाड घेऊन जाणारा टेम्पो पाचगणी येथे अवघड वळणावर उलटून २५ जण जखमी झाले. त्यातील चार जणांची प्रकृती गंभीर आहे. जखमींवर पाचगणी व महाबळेश्वर येथील रुग्णालयात उपचार सुरू आहेत.
पालान (ता मांढरदेव) येथील आनंदा धोंडिबा धायगुडे यांच्या मुलाचा आज घोटेघर (ता.जावली) येथे दुपारी विवाह होता. त्यासाठी टेम्पो क्रमांक (एमएच ४३ यु ७८६०) मधून पंचवीस वऱ्हाडी वाई-पाचगणीमार्गे घोटेघरला जात होते. भरधाव टेम्पो घेऊन जात असताना पाचगणीच्या हद्दीत अवघड वळणाचा अंदाज न आल्याने व चालकाचे नियंत्रण सुटल्याने टेम्पो रस्त्याच्या कडेला खड्ड्यात आदळून उलटला.
अपघाताची माहिती मिळताच पाचगणी येथील आपत्कालीन संस्थेचे सदस्य, पालिका कर्मचारी व पोलीस तात्काळ घटनास्थळी दाखल झाले. त्यांनी गंभीर जखमींना पाचगणी येथील खाजगी रुग्णालयात, तर किरकोळ जखमींना महाबळेश्वर ग्रामीण रुग्णालयात दाखल केले. गाडीचा चालक भरधाव वेगात गाडी चालवत असल्याने अपघात झाल्याचे टेम्पोतील वऱ्हाडींनी सांगितले. पोलिसांनी टेम्पो चालकाला ताब्यात घेतले आहे. सहाय्यक पोलीस निरीक्षक राजेश माने यांच्या मार्गदर्शनाखाली पोलीस हवालदार आर.के कदम अधिक तपास करीत आहेत.
