लोकसत्ता प्रतिनिधी
सातारा: डॉ. नानासाहेब धर्माधिकारी प्रतिष्ठानामार्फत हजारो सदस्यांच्या उपस्थितीत पुसेगाव येथे स्वच्छता अभियान राबवण्यात आले. श्रीसेवागिरी देवस्थान मंदिर ते जुना पोस्ट रोड (रथ मार्ग गावठाण), शिवाजी चौक ते शासकीय विद्यानिकेतन गेट, यात्रास्थळ पटांगण असा एकूण २० एकर परिसर, दुतर्फा रस्ता ७.३ किलोमीटर परिसरात महास्वच्छता अभियान होऊन १६९७ श्री सदस्यांनी दोन तासांत ५७ ट्रॅक्टर ट्रॉली कचरा हद्दपार करून परिसर चकाचक केला.
श्री सेवागिरी यात्रेसाठी लाखो भाविक पुसेगाव येथे श्रीसेवागिरी महाराज रथोत्सव यात्रेसाठी येतात. बारा दिवस यात्रा कालावधी असतो. भव्य यात्राप्रदर्शन पाहावयास मिळते. होणारा कचरा यात्रा संपन्न झाल्यानंतर अस्ताव्यस्त पाहायला मिळतो. ग्रामपंचायत व देवस्थान ट्रस्टमार्फत प्रतिष्ठानाला विनंती करण्यात आली. मनुष्यबळ महत्त्वाचे असल्याने अखंड समाजसेवेचे व्रत स्वीकारणाऱ्या डॉ. नानासाहेब धर्माधिकारी प्रतिष्ठानातर्फे राज्यपालनियुक्त स्वच्छतादूत महाराष्ट्रभूषण पद्मश्री डॉ. आप्पासाहेब तथा दत्तात्रेय नारायण धर्माधिकारी, रायगडभूषण डॉ. सचिन धर्माधिकारी, उमेश धर्माधिकारी, राहुल धर्माधिकारी यांच्या मार्गदर्शनाखाली रविवारी पुसेगावमध्ये महास्वच्छता अभियान झाले.
आणखी वाचा-फलटणमध्ये अंधश्रद्धेतून महिलेचा खून
अभियानाच्या प्रारंभप्रसंगी श्रीसेवागिरी देवस्थान ट्रस्ट व सातारा जिल्हा काँग्रेस कमिटी अध्यक्ष डॉ. सुरेश जाधव, विश्वस्त रणधिर जाधव, बाळासाहेब जाधव, सचिन देशमुख, संतोष वाघ, गौरव जाधव, माजी विश्वस्त सुनील जाधव, सरपंच घनश्याम मसणे, उपसरपंच विशाल जाधव, सहायक पोलीस निरीक्षक संदीप पोमण, डॉ. ओंकार हेंद्रे, डॉ. स्नेहा हेंद्रे, शासकीय विद्यानिकेतनचे प्राचार्य विजय गायकवाड, ज्येष्ठ नागरिक उपस्थित होते.
अभियानाचे शिस्तबद्ध नियोजन पाहून आम्ही भारावलो. यात्रा कालावधी झाल्यानंतर एवढा मोठा कचरा उचलणे आवाक्याबाहेर होते. मात्र, या स्वयंसेवकांनी निष्काम सेवेची पराकाष्ठा करून परिसर स्वच्छ केला. -डॉ. सुरेश जाधव, अध्यक्ष, श्री सेवागिरी देवस्थान ट्रस्ट, पुसेगाव
