सक्षम जनलोकपालच्या मुद्यावरून पुन्हा उपोषणास बसलेले ज्येष्ठ सामाजिक कार्यकर्ते अण्णा हजारे यांच्या राळेगणसिद्धीतील आंदोलनात गुरुवारी आम आदमी पार्टीने स्वत:ला चमकवण्याचा प्रयत्न केला. मात्र, यामुळे आंदोलनस्थळी नाराजीचा सूर उमटत असून अण्णांचे समर्थक विश्वंभर चौधरी यांनी आपला राग जाहीरपणे प्रकट केला. तर अण्णांची भेट घ्यायला आलेले ‘आप’चे कुमार विश्वास यांना एका तरुणाने धक्काबुक्की केल्याने टीम अण्णा आणि टीम केजरीवाल यांच्यातील दरी अधिक रूंदावली आहे.
दोन दिवसांपासून अण्णा हजारे राळेगणसिद्धीमध्ये उपोषणास बसले असून ‘उद्या आपण अण्णांना भेटण्यासाठी जाऊ’ असे ‘आप’चे प्रमुख अरविंद केजरीवाल यांनी बुधवारी म्हटले होते. मात्र, ऐनवेळी केजरीवाल यांनी ‘आजारी’ असल्याचे सांगत ही भेट रद्द केली. यामागे अण्णा व केजरीवाल यांच्यातील मतभेद कारण असल्याची चर्चा सुरू असतानाच विश्वास यांना धक्काबुक्की झाली.
विश्वास व त्यांचे सहकारी राळेगणसिद्घीत आल्यानंतर मुंबईतील नितीन चव्हाण या तरुणाने आम आदमी पार्टी मुर्दाबाद, अण्णा हजारे जिंदाबाद अशा घोषणा देत विश्वास यांना धक्काबुक्कीच केली. ते पाहून विश्वास यांच्या कार्यकर्त्यांनीही नितीनला धक्काबुक्की केली. पोलिसांनीच त्यात मध्यस्थी करून त्याला बसस्थानकापर्यंत पाठवले. तेथूनही त्यास राळेगणसिद्घीबाहेर पाठवून देण्यात आले.
विश्वास तसेच त्यांचे सहकारी संजय सिंह व गोपाल रॉय हे दुपारी एक वाजता राळेगणसिद्घीमध्ये पोहोचल्यानंतर त्यांनी हजारे यांच्याशी बंद खोलीत सुमारे पंचवीस मिनिटे चर्चा केली. आम आदमी पार्टीच्या मुंबईतील कार्यकर्त्यां अंजली दमानिया यांना मात्र या वेळी खोलीत प्रवेश नाकारण्यात आला. त्यामुळे त्या संतप्त झाल्या होत्या.
हा चळवळ ‘हायजॅक’ करण्याचा प्रयत्न
पुणे : ‘‘अरविंद केजरीवाल यांच्या आम आदमी पक्षाकडून चळवळ हायजॅक करण्याचे प्रयत्न सुरू आहेत. राजकीय फायदा उठवण्यासाठी असे प्रयत्न झाले तरी ते सफल होऊ देणार नाही,’’ असे अण्णांचे सहकारी डॉ. विश्वंभर चौधरी यांनी सांगितले.
चौधरी हे अण्णा हजारे यांच्यावर नाराज असल्याच्या बातम्या गुरुवारी प्रसिद्ध झाल्या होत्या. त्याबाबत चौधरी यांच्याशी संपर्क साधला असता, त्यांनी ‘आप’वर आरोप केला. ‘आप’ला लोकसभेच्या निवडणुकीपर्यंत हा मुद्दा भिजत ठेवायचा आहे. कारण लोकपाल विधेयक मंजूर झाले तर त्यांच्याकडे मुद्दाच राहणार नाही. याला आमचा विरोध आहे. त्यामुळे यंदा आम्ही आंदोलन ‘हायजॅक’ होऊ देणार नाही,’’ असे चौधरी म्हणाले.
‘‘आंदोलनाच्या ठिकाणी कुमार विश्वास आले. राजकीय भाष्य न करण्याबाबत त्यांना सांगितले होते. तरीही त्यांनी राजकीय वक्तव्ये केली. याबाबत मी नाराजी व्यक्त केली,’’ असे ते म्हणाले.
