मुंबई-आग्रा महामार्गावर भीषण अपघात; क्रूजर आणि रिक्षाच्या धडकेत तिघांचा मृत्यू तर ९ जण जखमी!

नेमकं काय घडलं?

सोमवारी रात्री उशीरा हा अपघात झाल्याची माहिती मिळाली आहे. मिळालेल्या माहितीनुसार, मालेगावहून मध्यप्रदेशच्या दिशेने कांदा भरून नेणाऱ्या एका मालमोटारीने रस्त्यावर समोर असलेल्या रिक्षाला मागून जोरात धडक दिली. यामुळे रिक्षाचालकाचं नियंत्रण सुटलं. रिक्षा समोरून विरुद्ध दिशेने येणाऱ्या क्रूजरवर जाऊन आदळली. यात अॅपे रिक्षा आणि क्रूजर गाडीचा चुराडा झाला. या अपघातात सरलाबाई पंडित सोनवणे (वय २९), रिक्षा चालक रईस शेख व महेंद्र चुडामन पाटील (वय ५१) सर्व रा. तरडी (ता पारोळा जि. जळगाव) यांचा मृत्यू झाला आहे.

पोलिसांच्या मदतीने जखमींना तत्काळ धुळे येथील भाऊसाहेब हिरे वैद्यकीय महाविद्यालयाच्या रुग्णालयात हलवून त्यांच्यावर उपचार सुरू करण्यात आले. तसेच, क्रेनच्या सहाय्याने अपघातग्रस्त वाहने बाजूला करून महामार्गावरील वाहतुकीची कोंडी फोडण्यात आली.

अपघातातील जखमींची नावे …

विद्या भूषण कानडे (वय २१), सुरेश नारायण सोनवणे (वय ६०), ताराबाई अशोक वसरे (वय ५०), सुपडू बारकू वसरे (वय ५५), कोयल प्रमोद सोनवणे (वय १२), वसंत पंडित वंजारी (वय ३३), प्रमोद रमेश सोनवणे (वय ४५), सुधीर अभिमान पाटील (वय ५४ ) आणि अरुणाबाई प्रमोद पाटील (वय ४५).