भुजबळांचं सूचक वक्तव्य, ‘त्या’ नेत्यांची घरवापसी?

एनडीएमधून बाहेर पडलेले उपेंद्र कुशवाह यांच्यासह भुजबळांनी आज (दि.१२) पुण्यात राष्ट्रवादी काँग्रेसचे अध्यक्ष शरद पवार यांची भेट घेतली. त्यानंतर पत्रकारांशी बोलताना काँग्रेस राष्ट्रवादीतून अनेकजण भाजपामध्ये गेले आता पुन्हा ते घरवापसी करतील का या प्रश्नावर ते म्हणाले की, भाजपाच्या ‘अच्छे दिन’चा भ्रमनिरास झालाय. पक्ष सोडून गेलेल्यांनी परत यायला हरकत नाही. माझ्या संपर्कात अनेक जण आहेत. पण, त्यांची नावे आताच सांगणार नाही. तसेच देशातील पाच राज्याच्या निवडणुकीचा निकाल लक्षात घेता भाजपाच्या शेवटाचा प्रवास सुरू झाला असून आम्हाला ‘अच्छे दिन’ नको तर ‘हमारे दिन’ हवे असा टोलाही भुजबळांनी लगावला. यापूर्वी राष्ट्रवादीचे नेते अजित पवार यांनीही काँग्रेस आणि राष्ट्रवादी काँग्रेस सोडून भाजपात सामील झालेले नेते पुन्हा स्वगृही परतण्याबाबत सूचक वक्तव्य केलं होतं.