शिंदे गटाच्या खासदारानंतर अजित पवार गटातील आमदार देणार राजीनामा? स्वत:च केलेल्या वक्तव्यानंतर चर्चेला उधाण

हेमंत पाटील यांच्यानंतर आता अजित पवार गटाचे जुन्नरचे आमदार अतुल बेनके यांनीही राजीनामा देण्याची तयारी दर्शवली आहे. माझ्या तालुक्यातील समाज बांधव आणि मराठा समाजाच्या संघटना जसं सांगतील तसा निर्णय मी घेणार आहे. त्यांनी राजीनामा द्यायला सांगितला तर माझी राजीनामा द्यायची तयारी आहे, असं विधान आमदार अतुल बेनके यांनी केलं आहे. अतुल बेनके यांच्या विधानानंतर विविध तर्क वितर्क लढवले जात आहेत.

हेही वाचा- मराठा आरक्षणासाठी शिंदे गटाच्या खासदाराचा राजीनामा! लोकसभा अध्यक्षांच्या नावे लिहिले पत्र

मराठा आरक्षणावर भाष्य करताना आमदार अतुल बेनके म्हणाले, “माझ्या तालुक्यातील माझे सर्व समाजबांधव, मराठा समाजाच्या सर्व संघटना मला जी दिशा सांगतील, त्या दिशेनं वाटचाल करण्याची माझी तयारी आहे. ते जर म्हणाले की, अतुल, तू राजीनामा दे… तर माझी राजीनामा द्यायची तयारी आहे. मराठा समाजाला आरक्षण मिळण्याकरता माझे समाजबांधव जसं सांगतील, तसं पुढे जाण्याची माझी तयारी आहे.”