केंद्रीय निवडणूक आयोगाने मोठा निकाल देत शिवसेना पक्षाचं नाव आणि चिन्ह धनुष्यबाण हे दोन्ही एकनाथ शिंदे यांच्याकडे दिलं आहे. त्यानंतर शिंदे गटाने राज्यभरात जल्लोष सुरू केला आहे. या निर्णयानंतर विविध राजकीय पक्षांचे नेते प्रतिक्रिया नोंदवत आहेत. विधानसभेचे विरोधी पक्षनेते आणि राष्ट्रवादी काँग्रेस पक्षाचे नेते अजित पवार म्हणाले, “निवडणूक आयोगाचा अतिशय अनपेक्षित असा निकाल आलेला आहे. शिवसेनाप्रमुख उद्धव ठाकरे यांनी मागणी केली होती की, हे प्रकरण सर्वोच्च न्यायालयात प्रलंबित आहे. तसेच आजच सर्वोच्च न्यायालयाने पुढील सुनावणी २१ फेब्रुवारी रोजी घेणार असल्याचे सांगितले होते, असे असतानाही निवडणूक आयोगाने एवढी घाई का केली? हे कळायला मार्ग नाही. परंतु निवडणूक आयोगाने निकाल दिलेला असला तरी उद्धव ठाकरे सर्वोच्च न्यायालयात जातील आणि तिथे न्याय मागतील”, असे माझे मत आहे.
“महाराष्ट्रातला शिवसैनिक हा उद्धव ठाकरे यांच्या पाठिशीच उभा राहिल आणि त्यांच्या विचारांचेच उमेदवार निवडून येतील, असे माझे ठाम मत आहे. मी आता उद्धव ठाकरे यांच्याबरोबर काम करत आहे म्हणून हे मत नाही, तर एक त्रयस्थ नागरिक म्हणून मला हे वाटतं. वास्तविक शिवसेना कुणी स्थापन केली? शिवसेनाप्रमुख कोण होते? बाळासाहेबांच्या नंतर शिवसेना कोण सांभाळत होतं, त्याचे निर्णय कोण घेत होतं. शिवसेनेचे मंत्रीपद कोण वाटत होतं, शिवसेनेचे सर्व निर्णय मातोश्रीवरुन होत होते. खरी शिवसेना मातोश्रीवरुन चालवली जात होती.”, अशी प्रतिक्रिया अजित पवार यांनी दिली.
मी जेव्हा महाराष्ट्रात फिरतो तेव्हा सर्वसामान्य शिवसैनिक आणि सामान्य जनता ही उद्धव ठाकरे यांना माननारी आहे. त्यांचीच शिवसेना ही खरी शिवसेना हे निवडणुकीत सिद्ध होईल, असेही अजित पवार म्हणाले.