पुढच्या काही दिवसांमध्ये लोकसभा निवडणुकांची घोषणा केली जाण्याची शक्यता आहे. त्यामुळे सर्वच पक्षांमध्ये इच्छुक उमेदवार, जागावाटप याबाबत खलबतं चालू आहेत. या पार्श्वभूमीवर महाराष्ट्रात नेमकं काय चित्र असेल? याची उत्सुकता राजकीय वर्तुळात दिसत आहे. राष्ट्रवादी काँग्रेस व शिवसेना या दोन्ही पक्षांमधून फुटून सत्तेत गेलेले गट महायुतीमध्ये आहेत. त्याचवेळी महाविकास आघाडीतही राजकीय महत्त्व आणि सध्याचं विद्यमान बलाबल याची सांगड घालण्याचे प्रयत्न होताना दिसत आहेत. या पार्श्वभूमीवर महायुतीच्या जागावाटपाबाबत अजित पवार यांनी सूचक विधान केलं आहे.
“राजकीय सुसंस्कृतपणाचा आदर्श ठेवायला हवा”
दिवंगत यशवंतराव चव्हाण यांच्या १११व्या जयंतीनिमित्ताने कराडच्या प्रीतीसंगम घाटावर अजित पवार उपस्थित होते. यावेळी माध्यमांशी बोलताना अजित पवार यांनी राजकारणातील सुसंस्कृतपणावर भाष्य केलं. “खऱ्या अर्थानं यशवंतराव चव्हाण यांनी राजकारणात सुसंस्कृतपणा कसा टिकवायचा असतो, सांभाळायचा असतो, काम करायचं असतं हे उभ्या महाराष्ट्राला दाखवलं. तोच आदर्श नव्या पिढीनं, आम्ही सगळ्यांनी ठेवला पाहिजे. अलिकडे वाचाळवीरांची संख्या वाढली आहे. काहीही बोलत असतात, कुणी खेकडा म्हणतं, कुणी वाघ म्हणतं. अशा गोष्टी थांबायला हव्यात”, असं अजित पवार म्हणाले.
जागावाटपाचं काय होणार?
दरम्यान, महायुतीच्या जागावाटपासंदर्भात सर्व मित्रपक्षांच्या दिल्ली-मुंबईत बैठका होताना दिसत आहेत. मंगळवारी महायुतीची दिल्लीत बैठक होणार असं सांगितलं जात असताना अजित पवारांनी मात्र त्याबाबत निश्चित काही ठरलेलं नसल्याचं नमूज केलं. “काल दिल्लीत बैठक होणार होती. पण कालची बैठक पुढे ढकलली आहे. ती आज किंवा उद्या होऊ शकते”, असं ते म्हणाले.Marathi News
“जागावाटपात प्रत्येकाचा सन्मान राखला जाईल”
“जागावाटपाची प्राथमिक चर्चा झाली आहे. तिन्ही पक्षांनी एकत्र बसून बोलणी केली. प्रत्येकाचा मान-सन्मान राखला जाईल, कार्यकर्त्यांना समाधान वाटेल असा तोडगा काढण्याचा प्रयत्न आमचा असेल. बहुतेक विद्यमान जागा त्या त्या पक्षाला सोडण्याची प्राथमिक चर्चा झालेली आहे. त्यासंदर्भात अंतिम चित्र आम्हालाही लवकरात लवकर स्पष्ट करावं लागणार आहे. १४-१५ तारखेला आचारसंहिता लागण्याची शक्यता आहे”, अशी माहिती अजित पवार यांनी दिली.
विजय शिवतारेंचं अजित पवारांना आव्हान
दरम्यान, एकीकडे विजय शिवतारेंनी अजित पवारांना आव्हान दिलेलं असताना अजित पवारांनी मात्र त्यावर काहीही बोलायचं नसल्याचं नमूद केलं. “विजय शिवतारेंबाबत मला काहीच बोलायचं नाही. सुसंस्कृतपणा सगळ्यांनी दाखवावा. वरीष्ठ पातळीवर सगळे निर्णय घेतील. राष्ट्रवादी काँग्रेस पक्ष, भाजपा, शिवसेना, महायुतीतील इतर घटक पक्ष या सगळ्यांनी वातावरण खराब होईल असं कोणतंच विधान करू नये”, असं आवाहन त्यांनी यावेळी केलं.
