सांगली, कोल्हापूरची पूरहानी टाळण्यासाठी अलमट्टीचा विसर्ग दुप्पट

चांदोली, कोयना धरणाच्या पाणलोट क्षेत्रात मुसळधार पाऊस कोसळत असून बुधवारी दिवसभर उघडीप दिल्यानंतर रात्रीपासून पुन्हा संततधार सुरू झाला आहे. दूधगंगा, तुळशी, पाटगाव धरण वगळता सर्व धरणांतून विसर्ग सुरू आहे. चांदोलीतून विसर्ग वाढवून ६७८० क्युसेक करण्यात आला आहे. यामुळे वारणा नदीपात्रातील पाणीपातळी वाढत आहे. कृष्णेची पाणीपातळी अजूनही मर्यादेत असून स्थिर आहे. चांदोली धरणाच्या वक्राकार दरवाजातून आज सकाळी १० वाजतापासून ५ हजार १५० क्युसेकचा आणि पायथा विद्युतगृहातून १६३० क्युसेकचा विसर्ग करण्यात येत आहे. यामुळे नदीपात्रातील पाणीपातळी वाढणार असून नदी चार दिवसांपासून पात्राबाहेर प्रवाहित आहे. कोकरूड बंधारा गेल्या आठ दिवसांपासून पाण्याखाली असून कोल्हापूर जिल्ह्यातील शाहूवाडी तालुक्याला जोडणारा पूल पाण्याखाली गेल्याने या मार्गावर वाहतूक बंद आहे.