“ते दिवस पुन्हा आणायचे असतील तर…” अमित देशमुखांचे विधान, शरद पवारांचे नाव घेत म्हणाले, “प्रत्येक…”

“ते दिवस पुन्हा आणायचे असतील तर…”

“सध्या या देशात, राज्यात नवी राजकीय परिस्थिती पुढे आली आहे. समाजाशी जुडलेली नाळ तोडून इकडे-तिकडे जाणं सुरू आहे. पण महाराष्ट्राच्या सर्वसामान्य माणसाला हे पटणार नाही, याची मला खात्री आहे. आपल्याला सामान्य माणसाचा विश्वास संपादन करायचा आहे. यशवंतराव चव्हाण, वसंतदादा पाटील, वसंतराव नाईक, शरद पवार, विलासराव देशमुख यांच्या काळात काँग्रेसला जे दिवस होते, तेच दिवस पुन्हा महाराष्ट्रात आणायचे आहेत. ते दिवस पुन्हा आणायचे असतील तर महाराष्ट्रातील प्रत्येक माणसापर्यंत आपले विचार न्यावे लागतील,” असे मत अमित देशमुख यांनी मांडले.

“मी तुमच्याबरोबर आहे”

आज आपल्याकडे सगळे आस लावून पाहात आहेत. महाराष्ट्रतील जनतेने आपल्यावर फार मोठी जबाबदारी टाकली आहे. त्यामुळे आपल्याला काम करावे लागेल. मी तुमच्याबरोबर आहे, असे स्पष्टीकरण अमित देशमुख यांनी दिले.

“विलासराव देशमुख यांच्यावरही कारवाई करण्यात आली होती”

“विलासराव देशमुख यांच्यावरही कधीकाळी कारवाई करण्यात आली होती. त्यांना काँग्रेस पक्षातून काही काळासाठी बेदखल करण्यात आले होते. त्या काळातही पत्रकारांशी संवाद साधत असताना ‘मला कोणी काँग्रेस पक्षातून काढून टाकेल. पण माझ्या रक्तातील काँग्रेस कशी काढणार,’ असे विलासराव देशमुख म्हणाले होते. विलासरावांचे हे वाक्य आजच्या राजकीय परिस्थितीवर महत्त्वाचे आहे,” असे अमित देशमुख यांनी सांगितले.

“मी काँग्रेसमध्येच बरा आहे”

दरम्यान, या भाषणात अमित देशमुख यांनी मी कोणत्याही अन्य पक्षात जाणार नाही, हेदेखील स्पष्ट केले. मी काँग्रेसमध्येच बरा असे त्यांनी सांगितले. माजी मुख्यमंत्री अशोक चव्हाण यांच्या भाजपा प्रवेशानंतर अमित देशमुखही भाजपात जाणार असा दावा केला जात होता. त्या चर्चांवर आता अमित देशमुख यांच्या वरील स्पष्टीकरणानंतर पडदा पडला आहे.