Video: मणिपूर घटनेवर भाष्य करणाऱ्या अण्णा हजारेंकडे संजय राऊतांनी केली ‘ही’ मागणी; म्हणाले…

संजय राऊत म्हणाले, “गेले काही दिवस अण्णा बोलतील, अशी मागणी करत होतो. मात्र, अण्णांनी थेट मणिपूरच्या विषयाला हात घातला. देशात अशा प्रकारच्या अनेक घटना घडत आहेत. पण, अण्णांची ओळख भ्रष्टाचार विरोधी म्हणून आहे. महाराष्ट्रात भाजपाने पुराव्यासह ज्यांच्यावर आरोप केले, ते सगळे सरकारमध्ये सामील झाले आहेत. यावर अण्णा हजारेंनी आवाज उठवला पाहिजे. अजित पवार, हसन मुश्रीफ किंवा शिवसेनेतून बेईमान होऊन गेलेल्या मंत्र्यांवर हजारो कोटींच्या भ्रष्टाचाराचे आरोप आहेत. याविषयावर अण्णा हजारेंनी मोठ्या आंदोलनाची घोषणा केली पाहिजे. आम्ही त्यांच्याबरोबर आहोत.”

हेही वाचा : “…तर अजित पवारांना फोडण्याची गरज नव्हती”, महादेव जानकरांचा देवेंद्र फडणवीसांना टोला

“ओवाळून टाकलेले भ्रष्टाचारी सरकारमध्ये सामील झाले आहेत. त्यांचा पंतप्रधान मोदी दिल्लीत सत्कार करत आहेत. दादा भुसे, राहुल कुल, अब्दुल सत्तार, राधाकृष्ण विखे पाटील यांचे घोटाळे अण्णांच्या डोळ्यासमोर घडत आहेत. रामलीला मैदानावर आंदोलन करून अण्णांनी देशाल जाग केलं होतं. आज अण्णांच्या आंदोलनाची खरी गरज आहे. अण्णांच्या आंदोलनामुळे भाजपा सत्तेत आला, तर काँग्रेस पायउतार झाली. आज भाजपाच्या भ्रष्टाचाराविरोधात अण्णांनी रणशिंग फुंकण्याची गरज आहे,” अशी मागणी संजय राऊत यांनी केली आहे.