“किरीट सोमय्यांकडे फार वेळ आहे, त्यांनी…”, अन्वय नाईक यांच्या पत्नीची संतप्त प्रतिक्रिया, गृहमंत्र्यांना भेटून केली तक्रार!

अन्वय नाईक यांच्या पत्नी अक्षता नाईक आणि त्यांच्या कन्या आज्ञा नाईक यांनी आज गृहमंत्री दिलीप वळसे पाटील यांची भेट घेऊन या संपूर्ण प्रकरणावर आपली भूमिका मांडली आहे. त्यानंतर माध्यमांशी बोलताना अक्षता नाईक यांनी आपली भूमिका मांडली.

“किरीट सोमय्यांनी फक्त एक कॉल केला तरी..”

“जे घडून गेलं ते घडून गेलं. मला वाटतं की आपण वर्तमान काळात जगायला हवं. किरीट सोमय्यांना जी काही माहिती हवी आहे, ती आरटीआय टाकून ते ऑनलाईन देखील घेऊ शकतात. ते जी काही केंद्राची सुरक्षा वापरत आहेत, त्यापेक्षा ऑफिसमधून त्यांनी एक फोन कॉल केला, तरी त्यांना सर्व काही गोष्टी मिळू शकतील. शक्तीप्रदर्शन करण्याची गरज नाही”, असं अक्षता नाईक यावेळी म्हणाल्या.

किरीट सोमय्यांनी आरोप केलेल्या ‘त्या’ १९ बंगल्यांचं काय आहे वास्तव? कोर्लाईच्या सरपंचांनीच केला खुलासा!

“जे काही व्यवहार झाले आहेत, ते दोन सुशिक्षित लोकांनी मिळून केले आहेत. सगळं विचार करून केले आहेत. जुने खड्डे उकरून काढत बसलो, तर त्याला काही अर्थ राहणार नाही”, असं त्या म्हणाल्या.

“सोमय्यांनी माझ्याकडे चहा-पाण्याला यावं”

दरम्यान, यावेळी बोलताना अक्षता नाईक यांनी किरीट सोमय्यांना खोचक सल्ला देखील दिला आहे. “किरीट सोमय्यांना फार वेळ आहे. त्यांना जे काही करायचंय, ते त्यांनी खुशाल करत राहावं. हवं तर माझ्या घरीही चहापाण्याला यावं. मी त्यांना सगळी माहिती द्यायला तयार आहे. हवं तर माझ्या बँक डिटेल्ससह सगळी माहिती द्यायला मी तयार आहे”, असं अक्षता नाईक यावेळी म्हणाल्या.