“आर्यन खानला NCB नं क्लीनचिट दिली, आता…”, नवाब मलिकांच्या अधिकृत अकाऊंटवरून ट्वीट!

६ हजार पानांचे आरोपपत्र!

एनसीबीने या प्रकरणात जवळपास सहा हजार पानांचे आरोपपत्र दाखल केले आहे. मात्र, या आरोपपत्रात आर्यन खानसह इतर ६ आरोपींचा समावेश करण्यात आलेला नाही. एनसीबीने दाखल केलेल्या आरोपपत्रानुसार आर्यन खानकडे ड्रग्ज सापडलं नव्हतं. त्यामुळे सुरुवातीला १४ जणांविरोधात गुन्हा दाखल केल्यानंतर चौकशीअंती ६ जणांविरोधात पुरावे मिळाले नसल्याचं एनसीबीकडून सांगण्यात आलं आहे. या पार्श्वभूमीवर आर्यन खान आणि इतर पाच जणांची नावं आरोपपत्रातून वगळण्यात आली आहेत.

एनसीबीकडून वगळण्यात आलेल्या नावांमध्ये आर्यन खान याच्यासह अविन शुक्ला, गोपाल आनंद, समीर साईघन, भास्कर अरोरा आणि मानव सिंघल यांचा समावेश आहे.

दरम्यान, आर्यन खानला क्लीनचिट मिळाल्यानंतर नवाब मलिक यांच्या अधिकृत ट्विटर अकाऊंटवरून यासंदर्भात सूचक ट्वीट करण्यात आलं आहे. “आर्यन खान आणि त्याच्यासोबत इतर पाच जणांना या प्रकरणात आता क्लीनचिट मिळाली आहे. त्यामुळे आता एनसीबी समीर वानखेडे, त्यांची टीम आणि त्यांच्या प्रायव्हेट आर्मीविरोधात कारवाई करेल का? की गुन्हेगारांना ते पाठिशी घालतील?” असा सवाल या ट्वीटमध्ये उपस्थित करण्यात आला आहे.

काय घडलं होतं गेल्या वर्षी?

एनसीबीने आर्यन खानसह ६ जणांना पुरावे न मिळाल्याने क्लीन चिट देताना या प्रकरणातील घटनाक्रमाची माहितीही दिली आहे. यानुसार एनसीबीने २ ऑक्टोबर २०२१ रोजी आर्यन, अरबाज, इशमत आणि गोमितला इंटरनॅशनल पोर्ट टर्मिनल येथून ताब्यात घेतलं. नुपूर, मोहक आणि मुनमुनला कार्डेलिया क्रूझवरून ताब्यात घेण्यात आलं. यापैकी आर्यन आणि मोहक वगळता सर्वांकडे ड्रग्ज सापडले. सुरुवातीला या प्रकरणाचा तपास मुंबई एनसीबीने केला. नंतर ६ नोव्हेंबर २०२१ रोजी या प्रकरणाचा तपास मुंबई एनसीबीकडून काढून एनसीबीच्या विशेष तपास पथकाकडे देण्यात आला. एसआयटीने १४ आरोपींविरोधात तपास केला. तपासात ६ जणांविरोधात पुरेसे पुरावे न मिळाल्याने त्यांचे आरोपपत्रातून नाव हटवण्यात आले.