सांगली : जिल्ह्यातील आठपैकी पाच जागांवर महायुतीने विजय संपादन करून जिल्ह्यावर वर्चस्व निर्माण केले आहे. आता नव्या सरकारमध्ये महायुतीमधून मंत्रीपदासाठी चार जणांची दावेदारी होत आहे. यामध्ये सुरेश खाडे, गोपीचंद पडळकर आणि सुधीर गाडगीळ यांची नावे पुढे आहेत.
विधानसभा निवडणुकीत महाविकास आघाडीतील काँग्रेस व राष्ट्रवादी काँग्रेसचा बालेकिल्ला उद्ध्वस्त करत महायुतीच्या उमेदवारांनी घवघवीत यश संपादन केले. मिरज, सांगली, शिराळा आणि जत या मतदार संघात भाजपने यश मिळवले, तर शिवसेना शिंदे पक्षाने खानापूरमध्ये यश संपादन केले. तर इस्लामपूरमध्ये आमदार जयंत पाटील यांचे लाखाचे मताधिक्य बारा हजारापर्यंत खाली आणले. राष्ट्रवादी काँग्रेसच्या दोन्ही गटात झालेल्या सरळ लढतीमध्ये विजय संपादन करतांना आमदार पाटील यांना बराच प्रयत्न करावा लागला. पलूस-कडेगावमध्ये माजी मंत्री आ. डॉ. विश्वजित कदम यांना विजयासाठी झगडावे लागले. जर या ठिकाणी क्रांती कारखान्याचे लाड कुटुंब सोबत नसते तर कदमांचाही विजय अवघड होता, असे सांगण्यात येत आहे. तर त्यांचे मावसबंधू विक्रम सावंत यांचा जत मतदार संघात आमदार गोपीचंद पडळकर यांनी पराभव केला.
आता नव्याने निवडून आलेल्या महायुतीतील आमदारांना मंत्रीपदाचे वेध लागले आहेत. शिराळ्यातून निवडून आलेले सत्यजित देशमुख, खानापूरचे सुहास बाबर हे पहिल्यांदाच विधानसभेत प्रवेश करत आहेत, तर सांगलीचे गाडगीळ यांची आमदार होण्याची तिसरी वेळ आहे. मंत्री खाडे हे सलग पाचव्यांदा निवडून आले असल्याने त्यांना ज्येष्ठत्व म्हणून मंत्रीपद दिले जाण्याची चिन्हे तर आहेतच, यापूर्वी ते जिल्ह्याचे पालकमंत्री तथा राज्याचे कामगार मंत्री होते. आता त्यांच्याकडे कोणता विभाग दिला जातो, याची उत्सुकता आहे. तर गाडगीळ यांना मंत्री करावे असा आग्रह मूळच्या भाजप कार्यकर्त्यांचा आहे. आ. पडळकर हे उपमुख्यमंत्री देवेंद्र फडणवीस यांच्या निकटचे मानले जात असल्याने त्यांनाही मंत्रीपदाची आस आहे.
शिवसेनेत फूट पडली त्यावेळी मुख्यमंत्री एकनाथ शिंदे यांचे सोबत जाण्यामध्ये स्व. अनिल बाबर पहिले आमदार होते. यामुळे त्यांना शिंदे मंत्रीमंडळात मंत्रीपद मिळेल असे वाटत होते. मात्र, ते वंचित राहिले. यामुळे त्यांचे पुत्र सुहास बाबर यांना राज्यमंत्रीपद मिळेल, अशी आशा खानापूर मतदार संघातील कार्यकर्ते व्यक्त करत आहेत.
