हिंगोली लोकसभा मतदारसंघातून शिवसेनेने विद्यमान खासदार हेमंत पाटील यांचं तिकिट कापलं आहे. हेमंत पाटील यांच्याऐवजी बाबूराव कदम यांना उमेदवारी देण्यात आली आहे. तर यवतमाळ वाशिममधून राजश्री पाटील यांना तिकिट देण्यात आलं आहे. यानंतर अयोध्या पौळ पाटील यांनी जुने व्हिडीओ पोस्ट करत हेमंत पाटील यांच्या प्रमाणेच श्रीकांत शिंदेंचाही पत्ता कट होईल असे संकेत दिले आहेत. ही पोस्ट चर्चेत आहे.
तीन दिवसांपासून सुरु होती चर्चा
मागच्या तीन दिवसांपासून हेमंत पाटील यांच्या उमेदवारीवर प्रश्नचिन्ह उपस्थित होत होतं. अखेर शिवसेनेचे हिंगोलीचे उमेदवार हेमंत पाटील यांचा पत्ता कट झाला. भाजपानं हेमंत पाटील यांच्या उमेदवारीला विरोध केल्यानंतर आता बाबूराव कदम हे शिवसेनेचे हिंगोलीचे नवे लोकसभेचे उमेदवार आहेत. कदम यांनी २०१९ मध्ये अपक्ष म्हणून हदगाव विधानसभा लढवली होती. त्यावेळी दुसऱ्या क्रमांकाची मतंही त्यांना मिळाली. मात्र हेमंत पाटील यांचं तिकीट भाजपच्या दबावामुळे बदलावं लागल्यामुळे एकनाथ शिंदे यांच्यासाठी मोठी अडचण आणि नामुष्की ओढवली आहे. अशात आता श्रीकांत शिंदे यांचीही अशीच गत होईल हे अशी खोचक पोस्ट अयोध्या पौळ पाटील यांनी केली आहे.
हे ही वाचा- अयोध्या पौळ यांच्या ‘त्या’ पोस्टमुळे कल्याणच्या उमेदवारीची चर्चा; नंतर खुलासा करत म्हणाल्या…
काय म्हटलं आहे अयोध्या पौळ पाटील यांनी?
माझी आई लहानपणापासून मला म्हणते “कार्टेऽऽ काळतोंऽडे कोणालाही काहीही मनापासून बोलत जाऊ नकोस, काळ्या जिभेची आहेस समोरच्याचं दुकान बंद होतंय तुझ्या बोलण्यानं….. आई म्हणते म्हणजे खरंच असेल…” “हॅशटॅग जसा माझा श्रीकांत तसा हेमंत”..
“हॅशटॅग अन्याय होऊ देणार नाही”.. ही पोस्ट त्यांनी केली आहे. तसंच १८ मार्च २०२४ चा एक व्हिडीओही पोस्ट केला आहे ज्यात त्या म्हणतात की हेमंत पाटील यांना तिकिट मिळणार नाही.
काय म्हटलं आहे व्हिडीओत?
हेमंत पाटीलने आधी तिकिट मिळवून दाखवावं. हेमंत पाटीलला तिकिट कसं मिळवायचं मी सांगते, तुला तिकिट मिळणार नाही पण तिकिट कसं मिळवायचं मी सांगते. हेमंतदादा तुझी आणि श्रीकांत शिंदेची चांगली मैत्री आहे. त्यामुळे तू रड, हात-पाय पकड, वेळ पडली तर लोटांगण घाल पण तिकिट मिळवून दाखव. हेमंत पाटीलना माझ्या शुभेच्छा आहेत. तू तिकिट मिळवलंस तर काही लाख मतांनी इथे पडणार आहेस. जर हेमंत दादाला तिकिट मिळालं आणि तो निवडून आला तर त्याची आरती ओवाळायला मी जाईन. असं झालं नाही तर मला नाचता येत नाही पण मी गणपती डान्स नक्की करेन. असं अयोध्या पौळ पाटील म्हणाल्या होत्या. तो व्हिडीओही त्यांनी पोस्ट केला आहे.
