Baramati Assembly Election Result 2024 Highlights Updates: अजित पवारांकडून पराभव झाल्यानंतर युगेंद्र पवार यांची पोस्ट, म्हणाले…

बारामती विधानसभा मतदारसंघात युगेंद्र पवार यांचा पराभव झाल्यानंतर त्यांनी मतदारांना आवाहन करणारी एक पोस्ट लिहिली आहे. यापुढे जनतेच्या सेवेसाठी काम करत राहिल, असे ते म्हणाले.

अजित पवार यांनी बारामती मतदारसंघात अखेर मोठा विजय मिळविला आहे. लोकसभा निवडणुकीत झालेल्या पराभवाचा वचपा काढत त्यांनी पुतण्या युगेंद्र पवारचा पराभव केला.

अजित पवार यांचा विजय होत आहे. याप्रसंगी सुनेत्रा पवार यांनी बारामतीकरांचे आभार मानले. अजितदादा मुख्यमंत्री व्हावेत, अशी आमच्या सर्वांची इच्छा आहे. पण शेवटी हा आकड्याचा खेळ आहे.

महायुतीला स्पष्ट बहुमत आणि अजित पवारांचे विक्रमी आमदार निवडून आल्यानंतर अजित पवार यांनी एक्सवर आभार माननारी पोस्ट केली आहे. ‘महाराष्ट्र चूज पिंक’ अशी पोस्ट अजित पवार यांनी टाकली.

Baramati Election Result Updates Ajit Pawar vs Sharad Pawar : महाराष्ट्र विधानसभा निवडणुकीच्या निकालाकडे आता सर्वांचेच लक्ष लागून राहिले आहे. या निवडणुकीच्या मतमोजणीच्या सुरुवातीच्या ट्रेंडमध्ये उपमुख्यमंत्री अजित पवार यांनी त्यांचे पुतणे व राष्ट्रवादी (शरद पवार)चे उमेदवार युगेंद्र पवार यांच्याविरोधात आघाडी घेतली आहे. अजित पवार महाराष्ट्र विधानसभेची ही निवडणूक बारामती मतदारसंघातून लढवत आहेत आणि पवार कुटुंबीयांच्या बालेकिल्ल्यात आपल्या पुतण्याविरुद्ध विजय मिळवून आठव्यांदा विजयी होण्याच्या दिशेने वाटचाल करत आहेत. मतमोजणीतील अजित पवारांनी घेतलेली आघाडी पाहता, आता बारामतीत त्यांच्या समर्थकांनी निकालाआधीच विजयाचा गुलाल उधळला आहे. (वाचा सविस्तर बातमी)

अजित पवार यांनी बारामती विधानसभा मतदारसंघात जोरदार मुसंडी मारली आहे. आठव्या फेरीअखेर अजित पवारांनी ७३,०२५ मते मिळवली आहेत. त्यांच्याकडे ३८ हजारांची आघाडी आहे.

बारामती विधानसभा मतदारसंघात अजित पवार यांनी मोठी आघाडी घेतली आहे. त्यामुळे त्यांच्या कार्यकर्त्यांनी जल्लोष करण्यास सुरुवात केली आहे.

अजित पवार यांनी आता निर्णायक आघाडी घेतली आहे. युगेंद्र पवार हे पिछाडीवर आहेत.

बारामतीमध्ये तिसऱ्या फेरीनंतर अजित पवारांनी मोठी आघाडी घेतली आहे. अजित पवारांना

९२०६ तर युगेंद्र पवार यांना ५००७ एवढी मते मिळाली आहेत.

तिसऱ्या फेरीनंतर युगेंद्र पवार ११ हजार मतांनी आघाडीवर आहेत.

महाराष्ट्र निवडणुकीचा निकाल आज लागणार आहे. या निवडणुकीत महाविकास आघाडी विरुद्ध महायुती असा सामना आहे. ही निवडणूक खूप चुरशीची झाली आहे. निवडणुकीचा निकाल पाहा एका क्लिकवर

बारामती विधानसभा मतदारसंघात पहिल्या फेरीत अजित पवार ९२९१ मतांनी आघाडीवर आहेत. तर युगेंद्र पवारांनी ५६६८ मते घेतली आहेत. अजित पवार ३६२३ मतांनी आघाडीवर आहेत.

बारामती विधानसभा मतदारसंघात पुतणे युगेंद्र पवार हे पोस्टल मतदानात आघाडीवर आहेत. त्यामुळे अजित पवारांना धक्का मिळाल्याचे बोलले जात आहे. ईव्हीएम यंत्राची मतमोजणी सुरू झाल्यानंतर कदाचित हे चित्र बदलू शकते.

मतमोजणीला सुरुवात झाली आहे. पहिल्या फेरीतील मतमोजणीचे कल समोर आले असून बारामतीत युगेंद्र पवार आघाडीवर आहेत.

अवघ्या पाच मिनिटांत राज्यातील २८८ विधानसभा मतदारसंघात मतमोजणीला सुरुवात होणार आहे. आधी पोस्टल मतदानाची मोजणी होईल. त्यानंतर ईव्हीएम यंत्रातील मतमोजणीला सुरुवात होईल.

राष्ट्रवादी काँग्रेस (शरद पवार) पक्षाचे उमेदवार युगेंद्र पवार यांचे वडील श्रीनिवास पवार यांनी बारामतीमध्ये कोण निवडून येणार, याबाबत माध्यमांशी चर्चा केली. बारामतीमधील दोन्ही उमेदवार तगडे आहेत, पण बारामतीकरांनी त्यांचा उमेदवार निवडलेला आहे. लवकरच बारामतीकरांच्या मनात कोण आहे? हे दिसेल, असे ते म्हणाले.

पुणे ग्रामीणचे पोलीस उपअधीक्षक सुदर्शन राठोड यांनी बारामतीमध्ये मतमोजणीच्या पूर्वतयारीचा आढावा घेतला. तसेच काय बंदोबस्त लावला आहे, याची माहिती दिली.

आमदार रोहित पवार आणि अजित पवार यांचे पुतणे रोहित पवार यांनी आपल्या एक्स अकाऊंटवर एक सूचक पोस्ट टाकली आहे. त्यात म्हटले आहे की, आजची सकाळ आपली आणि गुलालही आपलाच…

आज सकाळी ८ वाजता बारामती विधानसभा मतदारसंघात मतमोजणीला सुरुवात सुरुवात होणार आहे. मतमोजणी केंद्राबाहेर आता कार्यकर्ते जमू लागले आहेत.

थोड्याच वेळात विधानसभा निवडणुकीची मतमोजणी सुरू होणार आहे. बारामतीमध्ये कुणाचा विजय होणार? हे थोड्याच वेळात कळेल.

बारामतीचा गेल्या ५८ वर्षांपासून पवार कुटुंबाशीच निवडणुकीच्या राजकारणासंदर्भात संबंध आला आहे. १९६७ साली शरद पवार इथून निवडून आले होते. १९६७ ते १९९१ सालापर्यंत शरद पवारच इथून आमदार होते. त्यानंतर अजित पवार बारामतीमधून निवडून येऊ लागले. आता जवळपास ३५ वर्षांनंतर पुन्हा एकदा एका काकाकडून एका पुतण्याकडे आमदारकी जाण्याची चर्चा सुरू झाली होती. फक्त १९९१ साली ती पुतण्याकडे स्वत:हून सोपवलेली आमदारकी होती तर आता आमदारकीसाठी काका विरुद्ध पुतण्या असाच सामना उभा राहिला आहे.

इंडियन एक्स्प्रेसनं दिलेल्या वृत्तानुसार, बारामतीकरांची पसंती अजित पवारांनाच असल्याचं दिसून येत आहे. “दादाच येईल, पण घासून येईल. मी तुतारीला मत दिलं आहे. मी कायम शरद पवारांसोबत राहिलो आहे. पण तरीही मला वाटतं अजित पवारच यंदा जिंकतील. पण त्यांचं विजय मोठ्या फरकाने नसून काँटे की टक्कर होईल”, अशी प्रतिक्रिया श्रीमंत सुभाससिंग महाराज हायस्कूल अँड ज्युनिअर कॉलेजमधून मतदान करून बाहेर पडलेल्या एका मतदारानं इंडियन एक्स्प्रेसला दिली.

बारामती विधानसभेची मतमोजणी प्रक्रिया वखार महामंडळ गोडाऊन येथे होणार आहे. त्यासाठी प्रशासनाने तयारी पूर्ण केली आहे. बारामती लोकसभेसाठी एकूण २३ उमेदवार रिंगणात आहेत. मतमोजणीच्या एकूण २० फेऱ्या होणार आहेत.

बारामतीमध्ये वाढलेले तीन टक्के मतदान कुणाच्या पारड्यात जाणार अशी चर्चा आहे. शेवटच्या दिवसापर्यंत अजित पवार आणि युगेंद्र पवार यांच्यात अटीतटीचा सामना पाहायला मिळाला.

अजित पवार यांच्या विरोधात निवडणूक लढवत असलेला युगेंद्र पवार हा नवखा उमेदवार आहे. अजित पवार यांचे मोठे बंधू श्रीनिवास पवार यांचा तो मुलगा आहे. युगेंद्र आजवर व्यवसाय आणि शैक्षणिक संस्थेच्या माध्यमातून बारामतीशी जोडला गेला होता. आता तो थेट काकांच्या विरोधात मैदानात उतरला आहे.

बारामती विधानसभेत १ लाख ४२ हजार ९३२ पुरुष आणि १ लाख २९ हजार ४५९ महिला मतदारांनी मतदान केले. एकूण २ लाख ७२ हजार ४०२ मतदारांनी मतदानाचा हक्क बजावला. २०१९ च्या तुलनेत यंदा बारामतीमध्ये जवळपास तीन टक्क्यांहून अधिक मतदानाची नोंद झाली.

बारामती विधानसभा मतदारसंघात झालेल्या निवडणुकीत ७१.२७ टक्के मतदानाची नोंद झाली, अशी माहिती निवडणूक निर्णय अधिकारी वैभव नावडकर आणि सहायक निवडणूक निर्णय अधिकारी गणेश शिंदे यांनी दिली.