Vande Bharat Train : वंदे भारत या ट्रेनने प्रवास करणाऱ्या प्रवाशांसाठी आनंदाची बातमी आहे. शिर्डी आणि सोलापूर या दोन्ही शहरांमध्ये जाणाऱ्या वंदे भारत ट्रेन्सबाबत रेल्वेने मोठा निर्णय घेतला आहे. छत्रपती शिवाजी महाराज टर्मिनस ते सोलापूर आणि छत्रपती शिवाजी महाराज टर्मिनस ते शिर्डी या दोन्ही ट्रेन्सना आणखी एक एक थांबा देण्यात येणार आहे. रेल्वे विभागाने हा निर्णय घेतला आहे.
काय आहे हा निर्णय?
सोलापूरला जाणारी वंदेभारत ट्रेन ही आधी ठाण्याला थांबत नव्हती कल्याणला तिला थांबा दिला होता. मात्र आता ही ट्रेन ठाण्यालाही थांबणार आहे. तर छत्रपती शिवाजी महाराज टर्मिनसहून शिर्डीला जाणारी वंदे भारत ट्रेन ही कल्याणला थांबत नव्हती मात्र आता ही वंदे भारत ट्रेन कल्याणला थांबणार आहे. त्यामुळे आता प्रवाशांसाठी ही आनंदाचीच बातमी ठरली आहे. उद्यापासून म्हणजेच ४ ऑगस्टपासूनच या ट्रेन्स या कल्याणला थांबणार आहेत. मध्य रेल्वेने ट्विट करत याविषयीची माहिती दिली आहे.
दोन्ही वंदे भारत ट्रेन्स कल्याणला थांबणार
या निर्णयामुळे सोलापूर आणि शिर्डी या दोन्ही ठिकाणी जाणाऱ्या वंदे भारत ट्रेन्स या कल्याणला थांबणार आहेत. वंदे भारत ट्रेनमुळे वेळेची बचत होते त्यामुळे या ट्रेनचं तिकिट जास्त असलं तरीही या ट्रेनला चांगला प्रतिसाद मिळतो आहे. सोलापूरला जाणारी वंदेभारत ट्रेन ही अवघ्या तीन तासात मुंबईहून पुण्यात पोहचते. मुंबई ते शिर्डी हे अंतर सहा तासांमध्ये कापलं जातं. १० फेब्रुवारी २०२३ या दिवशी महाराष्ट्रात दोन वंदे भारत ट्रेन्स सुरु झाल्या होत्या. पहिली ट्रेन मुंबई ते सोलापूर अशी तर दुसरी ट्रेन ही मुंबई ते साईनगर शिर्डी अशी आहे.
