Sharad Pawar : “सुनेत्रा पवार पराभूत झाल्या, तेव्हा बोलला असतात तर…”; भाजपाचे शरद पवारांना प्रत्युत्तर

शरद पवार काय म्हणाले होते?

महाराष्ट्र विधानसभा निवडणूक निकालानंतर पहिल्यांदाच माध्यमांशी बोलताना शरद पवार म्हणाले होते की, “जम्मू काश्मीरमध्ये भाजपाच्या विरोधात जे होते त्यांना यश आलं आणि हरियाणा भाजपाकडे गेलं. त्यानंतर महाराष्ट्राची निवडणूक ठरलेल्या महिन्यापेक्षा एक महिना उशिरा घेतली आणि नंतरही ती झारखंडबरोबर घेतली. झारखंडमध्ये काँग्रेसला यश आहे आणि इथं (महाराष्ट्रात) अपयश आहे. त्यामुळे लहानसं राज्य विरोधकांच्या यशासाठी आणि मोठं राज्यं सत्ताधाऱ्यांच्या लाभासाठी असा काहीतर गंमतीदार ट्रेंड दिसतो. म्हणजे उद्या कोणी मशीनसंबंधी (EVM) आक्षेप घेतला तर म्हणता येईल की मशीनसंबंधी तुम्ही आक्षेप घेता, पण त्या राज्यात तुमची सत्ता आली ना, तेव्हा हेच मशिन होतं” असे शरद पवार म्हणाले होते.

तसेच ईव्हीएमबद्दल पुढे बोलताना त्यांनी, “आमच्या काही सहकाऱ्यांनी ईव्हीएमवर शंका घेतली. मात्र, जोपर्यंत अधिकृत माहिती हातात येत नाही तोपर्यंत मी याबाबत काहीही भाष्य करणार नाही”, असं शरद पवारांनी म्हटलं होतं.

हेही वाचा >> काँग्रेसच्या कार्यक्रमात राहुल गांधींचा माइक बंद; संविधान दाखवत सावरकरांबद्दल म्हणाले…

बावनकुळे काय म्हणाले आहेत?

शरद पवारांनी उपस्थित केलेल्या शंकेबद्दल प्रतिक्रिया देताना बावनकुळे यांनी लोकसभा निवडणुकीचे उदाहरण दिले. जेव्हा बारामती लोकसभा मतदारसंघात सुप्रिया सुळे जिंकल्या आणि सुनेत्रा पवार पराभूत झाल्या तेव्हा तुम्हाी का बोलला नाहीत अशा सवाल त्यांनी पवारांना केला.

“शरद पवार यांच्यासारख्या प्रगल्भ आणि अभ्यासू व्यक्तीने निवडणुकीत पराभव झाल्यामुळे असे बोलणे मला न पटणारे आहे. शरद पवार हे महाविकास आघाडीचे नेते आहेत. किमान त्यांनी तरी असा विचार करू नये… मग बारामतीतून सुप्रिया सुळे निवडून आल्या आणि सुनेत्रा पवार हरल्या तेव्हा तुम्ही का नाही बोललात? तुम्ही चार महिन्यांपूर्वीचे विसरून गेलात. सुनेत्रा पवार त्या ईव्हीएम मशीनमुळे हरल्यात… आमच्या वहिनी हारल्या, सुप्रिया सुळे निवडून आल्या त्यावेळेस तुम्ही बोलला असतात तर बरं झालं असतं”, असे चंद्रशेखर बावनकुळे म्हणाले.