ग्रामपंचायत निवडणुकांच्या निकालात भाजपा हाच पक्ष नंबर वन ठरला आहे. तसंच या निवडणूक निकालांमध्ये महायुतीची सरशी झाली आहे. त्यानंतर आता भाजपा नेते आशिष शेलार यांनी उद्धव ठाकरेंवर बोचरी टीका केली आहे. उद्धव ठाकरेंना मराठी माणसाने झिडकारल्याचं त्यांनी म्हटलं आहे.
काय म्हटलं आहे आशिष शेलार यांनी?
“उद्धव बाळासाहेब ठाकरे गटाला महाराष्ट्रातल्या मराठी माणसाने आणि महाराष्ट्राने झिडकारलं आहे. त्यांनी बाळासाहेबांच्या विचारांशी केलेली प्रतारणा महाराष्ट्राला मान्य नाही. उद्धव ठाकरेंनी बदलेले विचार आणि मतांसाठी सुरु केलेलं लांगुलचालन याला महाराष्ट्रातल्या मराठी माणसाने लाथ मारली आहे. उद्धव ठाकरेंनी केलेली काँग्रेसशी युती , राम मंदिर, रामजन्मभूमी, त्यासाठीची वर्गणी याची केलेली चेष्टा हे मराठी माणसाला न आवडल्याचं या निकालांमधून स्पष्ट दिसतं आहे.” असं म्हणत आशिष शेलार यांनी उद्धव ठाकरेंवर टीका केली आहे.
नाना पटोलेंवर टीका
नाना पटोलेंना खुमखुमी असेल तर माझं थेट आव्हान आहे. त्यांनी स्वतःच्या आमदारकीचा राजीनामा द्यावा आणि तिथे पोटनिवडणूक घेऊन दाखवावी. नाना पटोलेंना भाजपा आणि महायुती त्यांना चारी मुंड्या चीत करुन दाखवेल. उथळ पाण्याला खळखळाट फार अशी मराठीत म्हण आहे तशीच आत्ता नाना पटोलेंची अवस्था आहे. असंही शेलार म्हणाले.
नाना पटोलेंचा दावा आहे की त्यांचा पक्ष ग्रामपंचायत निवडणुकीत नंबर वन आहे. अहो त्यांच्या नावातच नाना आहे. नावात नकारघंटा असलेला माणूस सत्य कसं बोलणार? शेवटून पहिला किंवा दुसरा नंबर आला आहे ते जर त्यांना सर्वाधिक वाटत असेल तर ते बरोबरच असेल. भाजपाच्या जितक्या जागा निवडून आल्या तेवढ्या जागांची एकूण संख्याही महाविकास आघाडीची झालेली नाही. एकनाथ शिंदे, देवेंद्र फडणवीस, अजित पवार यांच्या नेतृत्वात सरकार विकास करतं आहे. या सरकारला जनतेने हा कौल दिला आहे असंही आशिष शेलार म्हणाले आहेत.
