‘२०२४ मध्ये तुम्हाला कोण मुख्यमंत्री हवाय,’ असा प्रश्न विचारत भाजपा प्रदेशाध्यक्ष चंद्रशेखर बावनकुळे यांनी ठाण्यातील प्रमुख कार्यकर्त्यांची ‘मन की बात’ जाणून घेतली होती. त्यावर ‘देवेंद्र फडणवीस’ यांचे नाव भाजपाच्या कार्यकर्त्यांनी एखमुखी घेतले. यानंतर ‘तुम्हाला जो कोणी मुख्यमंत्री हवाय, त्यासाठी कामाला लागा,’ असा सूचक इशारा बावनकुळेंनी दिल्यानं अनेकांच्या भुवया उंचावल्या आहेत.
यावरूनच माजी गृहमंत्री अनिल देशमुख यांनी भाजपा प्रदेशाध्यक्ष चंद्रशेखर बावनकुळे यांच्यासह उपमुख्यमंत्री देवेंद्र फडणवीस यांना टोला लगावला होता. “अहो बावनकुळे साहेब… देवेंद्र फडणवीस यांना मुख्यमंत्री होण्यासाठी पहिलं आमदार व्हावं लागेलं. तुमच्याच पक्षाचे लोक नागपूर मध्ये निवडणुकीची वाट पाहत आहेत,” अशी पोस्ट अनिल देशमुखांनी ‘एक्स’ ( ट्वीटर ) अकाउंटवर शेअर केली होती.
आता अनिल देशमुखांना भाजपानं प्रत्युत्तर दिलं आहे. भाजपानं ‘एक्स’ अकाउंटवर लिहिलं की, “अहो वसुली साहेब… तुम्हाला जनतेसमोर मतं मागायला जातांना १०० कोटीचा हिशोब तर द्यावाच लागेल. पळ काढून कुठं पळता? तुम्हाला पळता पण येणार नाही माढा सारख. आणि हो तुमची वाट तुरुंगाच्या भिंती पण पाहत आहेत.”
हेही वाचा : “जयंत पाटील आमच्याच संपर्कात,” मंत्री धर्मरावबाबा आत्राम यांचे प्रत्युत्तर; म्हणाले, “शरद पवारांकडे कोणीही…”
नेमकं बावनकुळे काय म्हणाले होते?
भाजपाच्या महाविजय २०२४ अभियानातर्गत प्रदेशाध्यक्ष चंद्रशेखर बावनकुळे हे राज्यातील ४८ लोकसभा मतदारसंघांचे दौरे करीत आहेत. मंगळवारी ठाणे लोकसभा मतदार संघातील कार्यकर्त्यांबरोबर बावनकुळेंनी संवाद साधला. यावेळी ‘२०२४ मध्ये तुम्हाला मुख्यमंत्री कोण हवाय?’ असा प्रश्न बावनकुळे यांनी पदाधिकाऱ्यांना विचारला. त्यावर ‘देवेंद्र फडणवीस’ यांचे नाव कार्यकर्त्यांनी एकमुखी घेतले. या मागणीनंतर बावनकुळे यांनी ‘मग लागा कामाला’ असा सूचक इशारा कार्यकर्त्यांना दिला.
