डान्सबार बंद झाले पाहिजे: रावसाहेब दानवे

रावसाहेब दानवे यांनी गुरुवारी पिंपरी- चिंचवडमधील भाजपा कार्यकर्त्यांचा मेळावा घेतला. या मेळाव्यात अनेक पदाधिकारी उपस्थित होते. मेळाव्यानंतर त्यांनी पत्रकारांशी संवाद साधला. डान्सबारसंदर्भात सुप्रीम कोर्टाने दिलेल्या निर्णयावर दानवे म्हणाले, मी अजून सुप्रीम कोर्टाच्या निर्णयाची प्रत वाचलेली नाही. पण डान्सबार हे बंद असले पाहिजे, हे माझे वैयक्तिक मत असून पक्षाचीही हीच भूमिका आहे, असे त्यांनी नमूद केले.

काही महिन्यांपूर्वी पिंपरी-चिंचवडच्या जाहीर सभेत रावसाहेब दानवे यांनी अजित पवार यांना सिंचन घोटाळ्या प्रकरणी अटक होऊ शकते, असा दावा केला होता. अजित पवारांच्या दारात पोलीस उभे आहेत,कोणत्याही क्षणी अटक होऊ शकते असे विधान त्यांनी केले होते. गुरुवारी पत्रकार परिषदेत दानवे यांना पुन्हा एकदा यासंदर्भात प्रश्न विचारण्यात आला. निवडणुकीपूर्वी अजित पवार तुरुंगात जाणार का?, असा प्रश्न त्यांना विचारण्यात आला. मात्र, दानवे यांनी या प्रश्नावर मौन बाळगले. तर डोंबिवलीतील भाजपा पदाधिकाऱ्याच्या दुकानातून सापडलेल्या शस्त्रसाठ्याच्या बातमीवरही त्यांनी प्रतिक्रिया देणे टाळले.