लोकसत्ता, विशेष प्रतिनिधी
अलिबाग: ठाकरे आणि वायकर कुटुंबियांच्या नावे असलेल्या कथित १९ बंगले घोटाळा प्रकरणामुळे चर्चेत आलेल्या कोर्लई ग्रामपंचायतीच्या आजी माजी सरपंच आणि ग्रामसेवकांविरोधात रेवदंडा पोलीस ठाण्यात गुन्हा दाखल करण्यात आला आहे. मुरुडच्या गट विकास अधिकाऱ्यांनी १३ जणांविरोधात गुन्हा नोंदविला आहे. गेल्या दोन महिन्यात ग्रामपंचायत सरपंच आणि ग्रामसेवकांविरोधात दाखल झालेला हा दुसरा गुन्हा आहे
अनियमितता आणि दिशाभूल करणाऱ्या खोट्या नोंदी करणाऱ्या आणि ग्रामपंचायतीच्या कामकाजासाठी जबाबदार असणाऱ्या १३ जणांविरोधात भादवी कलम ४२०. ४६५, ४६६, ४६८, २०४, १६६, १६७स २१८ आणि ३४ अन्वये हा गुन्हा नोंदविण्यात आला आहे. जिल्हा परिषदेचे मुख्य कार्यकारी अधिकारी यांनी दिलेल्या प्राधिकारपत्रानुसार मुरुडच्या गट विकास अधिकारी संगीता भिंगारे यांनी याबाबतची तक्रार रेवदंडा पोलीस ठाण्यात नोंदविली आहे. या तक्रारीनुसार गुन्हा दाखल झाला असून पोलीस निरीक्षक देविदास मुपडे या प्रकरणाचा तपास करत आहेत.
आणखी वाचा-आता कनिष्ठ अधिकाऱ्यांकडे विभागाचा कार्यभार देणे बंद होणार
ठाकरे आणि वायकर यांच्या कुटुंबियांच्या नावावर असलेल्या १९ बंगल्यांच्या कथित घोटाळा प्रकरणी तत्कालीन ग्रामसेवक आणि सरपंचांवर यापूर्वीच गुन्हा दाखल करण्यात आला होता. यानंतर जिल्हा परिषदेने ग्रामपंचायत हद्दीतील गावठाण आणि गावठाणा बाहेरील नियमबाह्य आणि अनधिकृत बांधकामांची चौकशी सुरू केली होती. यात २००५ ते २०२२ या कालावधीत गावठाणा बाहेर २६३ तर गावठाणात ६३ बांधकामे झाल्याचे चौकशी दरम्यान समोर आहे. यात ग्रामपंचायतीने गावठाणाबाहेर नियमबाह्य बांधकाम परवाने आणि दुरुस्ती परवाने दिले गेले. तसेच काही बांधकामांना कागदपत्रांची पूर्तता न करताच परवानगी दिली गेली. मिळकत नोंद वहीत नोंदी करतांना अनेक त्रूटी समोर आल्या. काही मिळकती अस्तित्वात नसूनही त्यांच्या नोंदी घेतल्या गेल्या. मासिक सभांची अनेक इतवृत्त रजिस्टर आढळून आली नाहीत. बांधकाम परवानगी बाबत तसेच दुरुस्तीबाबतची अनेक कागदपत्रे आढळून आली नाहीत.
ही बाब लक्षात घेऊन गटविकास अधिकाऱ्यांनी २००५ ते २०२२ या कालावधीत ग्रामपंचायतीवर कार्यरत असणाऱ्या सरपंच आणि ग्रामससेवकांविरोधात गुन्हा दाखल केला आहे. त्मामुळे ग्रामपंचायतीचे आजी माजी सरपंच आणि आजी माजी ग्रामसेवक पोलीस तपासाच्या रडारवर येणार आहेत. भाजप नेते किरीट सोमय्या यांनी ग्रामंपचायतीच्या कारभाराबाबत गंभीर प्रश्न उपस्थित केले होते. यानंतर या चौकशीला सुरुवात झाली होती..
