डहाणू तालुक्यात ‘स्मार्ट’ पाडा

विजय राऊत, कासा

शहरांच्या विकासासाठी सरकारने ‘स्मार्ट सिटी’ योजना राबवली. शहरे जरी स्मार्ट होत असली तरी पालघर तालुक्यातील दुर्गम आणि आदिवासी भागांतील अनेक गावे मात्र मागासलेली आहेत. मात्र आपल्या मागासपणावर मात करत डहाणू तालुक्यातील एका पाडय़ाने स्वत:मध्ये ‘स्मार्ट’ बदल घडवून आणला आहे. सिमेंटचे रस्ते, आकर्षक रंगांनी रंगवलेली घरे, घराभोवती बागकाम, रस्त्यांच्या बाजूला फुलझाडे, सौरऊर्जेचा वापर अशा अनेक प्रकारे या पाडय़ाचे सुशोभीकरण करण्यात आले आहे.

डहाणू तालुक्यातील जामशेत ग्रामपंचायतअंतर्गत गोरवाडी गावाच्या हद्दीत चिंचपाणीपाडा आहे. या पाडय़ामध्ये प्रवेश केल्यास सिमेंटचे रस्ते पाहावयास मिळतात. या ठिकाणी ४७ घरे असून या प्रत्येक घराला बांबूचे कुंपण केले आहे. या कुंपणाला ऑइल पेंटचा रंग देऊन सुशोभित करण्यात आले आहे. पाडय़ावरील प्रत्येक घराच्या भिंतीला रेड ऑक्साइड रंग दिल्याने घरांचे सौंदर्य नजरेत भरण्यासारखे आहे. प्रत्येक घराच्या भिंतीवर वारली चित्रे काढून आदिवासी लोककला जतन करण्याचा प्रयत्न करण्यात आलेला आहे.

रस्त्याच्या बाजूला प्रत्येकी पाच गुलाब, पाच मोगरा, एक रातराणी आणि एक नारळाचे झाड दिमाखाने उभी असल्याचे दिसून येते. त्याचप्रमाणे प्रत्येक घराच्या तिन्ही कोपऱ्यावर दोन पपईची झाडे, दोन केळीचे तसेच आंबा, बांबू, लिंबू इत्यादी झाडांची लागवड केल्याचे दिसते. प्रत्येक घराला असणारी परसबाग ही त्या घराच्या सौंदर्यात अधिकच भर घालत आहे. डहाणू तालुक्यातील अनेक गावांमध्ये विजेची समस्या पाहायला मिळते. मात्र या पाडय़ावरील प्रत्येक घरात सौर ऊर्जा यंत्रणा बसवण्यात आली आहे. त्यामुळे रहिवाशांना कोणत्याही अडथळय़ाशिवाय वीज उपलब्ध होत आहे, त्याशिवाय त्यासाठी कोणताही आर्थिक खर्च करावा लागत नाही.

मुंबईतील लायन्स क्लबच्या सौजन्याने हा पाडा स्मार्ट करण्यात आला आहे. ‘पूर्वी या पाडय़ावर अनेक पायाभूत सुविधांचा अभाव होता. आम्ही प्रत्येक गोष्टीचे नियोजन केले. पाणी, वीज या समस्या सोडवण्यास प्राधान्यक्रम दिला. पाडय़ांमध्ये विविध ठिकाणी झाडांची लागवड करण्यात आली असून आता हा पाडा खूपच सुंदर दिसत आहे,’ असे लायन्स क्लबच्या अरविंद पटेल यांनी सांगितले.

काही दिवसांपूर्वी या पाडय़ाची अवस्था अतिशय बिकट होती. या ठिकाणी रस्ते, पाणी, वीज यांच्या समस्या होत्या. मात्र लायन्स क्लबने मदत केल्याने या समस्यांचे निराकरण झाले आणि या पाडय़ाचे सुशोभीकरण झाले.

– सीमा घाटाळ, रहिवासी, चिंचपाणीपाडा