राज्यातील करोना निर्बंधावरून भाजपाचे प्रदेशाध्यक्ष चंद्रकांत पाटलांनी राज्य सरकारने विश्वासात घेतलं नसल्याचा आरोप करत टीका केली. यावर राज्याचे ग्रामविकास मंत्री हसन मुश्रीफ यांनी चंद्रकांत पाटलांना टोला लगावत त्यांना मोदींचे नियम मान्य नसतील तर आम्ही तसं मोदींना कळवू असं मत व्यक्त केलं. यावर आता चंद्रकांत पाटलांनी प्रत्युत्तर देत हसन मुश्रीफ यांना कागलच्या बाहेरचं काही समजत नाही, असं म्हणत टीका केली.
चंद्रकांत पाटील म्हणाले, “हसन मुश्रीफ यांना कागलच्या बाहेरचे काही समजत नाही. राज्यात करोना नियंत्रणाबाबत एकसूत्री कारभाराचा अभाव आहे. शाळा सुरू ठेवायच्या, बंद करायच्या की ऑनलाइन सुरु ठेवायच्या याबाबतही समन्वय नाही. यावर भाजपचा आक्षेप आहे.”
हसन मुश्रीफ काय म्हणाले होते?
करोना निर्बंध लागू करताना राज्य शासनाने विरोधी पक्षाला विश्वासात घेतले नाही असा आरोप चंद्रकांत पाटील यांनी केला. यावर मुश्रीफ यांनी टोला लगावला. हसन मुश्रीफ म्हणाले, “केंद्र सरकारने लागू केलेल्या नियमावलीप्रमाणे राज्य शासनाचे निर्बंध आहेत. नरेंद्र मोदी यांनी दिलेली नियमावली चंद्रकांत पाटील यांना मान्य नसेल, तर आम्ही मोदी यांना तसे कळवू.”
“परिवहन मंत्री सल्ला घेण्यासाठी शरद पवारांकडे जातात, पण सारे निर्णय…”
दरम्यान, चंद्रकांत पाटील यांनी शरद पवार यांच्यासह परिवहन मंत्री अनिल परब यांनाही टोला लगावला. चंद्रकांत पाटील म्हणाले, “राष्ट्रवादीचे नेते शरद पवार यांनी ३ राज्यातील निवडणुका लढवणार असल्याचे विधान केले आहे. मात्र, यापूर्वी झालेल्या निवडणुकांमध्ये उमेदवारांची जप्त झालेली अनामत रक्कम, पराभव याचा कसलाही विचार न करता राष्ट्रवादी निवडणूक लढवत आहे. अन्य राज्यात निवडणुका लढवून आपला पक्ष राष्ट्रीय स्तरावरचा आहे हे दाखवण्याचा हा प्रयत्न आहे. असं असलं तरी त्यातून फारसे काही साध्य होणार नाही.”
“परिवहन मंत्री अनिल परब शरद पवार यांच्याकडे सल्ला घेण्यासाठी जातात. मात्र, सारे निर्णय पवार हेच घोषित करतात,” असं म्हणत चंद्रकांत पाटलांनी टोला लगावला.
“फसवून पराभूत करणे ही काँग्रेसची परंपरा”
कोल्हापूर जिल्हा मध्यवर्ती सहकारी बँकेच्या निवडणुकीत भाजप व भाजपच्या सहयोगी उमेदवारांना पराभूत करणे ही सत्ताधाऱ्यांची परंपराच आहे, अशी टीका चंद्रकांत पाटील यांनी केली. जिल्हा बँकेच्या निवडणुकीत भाजपचे सहयोगी आमदार प्रकाश आवाडे, अशोक चराटी आदींचा पराभव झाला आहे. याकडे लक्ष वेधले असता चंद्रकांत पाटील म्हणाले, “जिल्हा बँकेच्या निवडणुकीत भाजपाची ताकद मर्यादित होती. अधिक जागा देणाऱ्या सत्ताधारी काँग्रेस-राष्ट्रवादी आघाडीकडे जाण्याचा निर्णय घेतला. परंतु त्यांनी आवाडे, चराटी यांना राजकारण करून पराभूत केले. फसवून पराभूत करणे ही त्यांची परंपराच आहे. तरीही जिल्हा बँकेमध्ये भाजपचे तीन सदस्य आहेत.”
“…म्हणून शिवसेनेचे खासदार संजय मंडलिक यांनी सत्ताधाऱ्यांवर टीका केली”
“शिवसेनेचे खासदार संजय मंडलिक यांनी सत्ताधाऱ्यांवर टीका केली आहे. उद्या त्यांनी काही वेगळी भूमिका घ्यायची ठरवले, तर त्यांना आमच्या संचालकांचा उपयोग होईल,” असे म्हणत त्यांनी नव्या राजकीय जोडणीला प्रतिसाद दिला.
