“अजित पवारांनी भाजपाशी संपर्क…”, चंद्रकांत बावनकुळेंचं महत्त्वाचं विधान

चंद्रशेखर बावनकुळे म्हणाले, “मी कालही स्पष्ट केलं आहे की, भाजपाकडे असा कोणताही प्रस्ताव नाही. अजित पवारांच्या नेतृत्वावर वारंवार कोण प्रश्न उपस्थित करत आहे हे त्यांनीच तपासलं पाहिजे. आमच्याकडून अशी कोणतीही चर्चा नाही. मी अजित पवारांच्या प्रतिमेला धक्का लागेल किंवा जी गोष्ट घडलीच नाही त्याविषयी मी चुकीची माहिती सांगणार नाही. कुणीच अशी चुकीची माहिती देऊ नये.”

“अजित पवारांनी भाजपाशी संपर्क केलेला नाही”

“अजित पवारांनी भाजपाशी संपर्क केलेला नाही. भाजपाही त्यांच्या संपर्कात नाही. कपोलकल्पित बातम्या तयार होत आहेत. अजित पवारांचे विरोधक या बातम्या तयार करत असतील,” असं चंद्रशेखर बावनकुळेंनी म्हटलं.

“सुरुवात तर संजय राऊतांनीच केली”

“अजित पवार भाजपाबरोबर जाण्याच्या बातम्या पसरवण्यात संजय राऊतांची भूमिका?” असा प्रश्न विचारला असता बावनकुळे म्हणाले, “सुरुवात तर संजय राऊतांनीच केली. उद्धव ठाकरे आणि संजय राऊत शरद पवारांना जाऊन भेटले. त्यानंतर या बातम्यांना पेव फुटला. त्यामुळे अजित पवारांनी स्पष्ट केलं की, सुरुवात कुणी केली. त्यामुळे संजय राऊत शरद पवारांचं ऐकतात की आणखी कुणाचं ऐकतात याबद्दल मला काही बोलायचं नाही.”

हेही वाचा : ‘कुऱ्हाडीचा दांडा गोतास काळ’, अजित पवारांचा उल्लेख करत भाजपाकडून संजय राऊत लक्ष्य, म्हणाले, “उद्धव ठाकरे…”

“दोन वर्षांपासून अजित पवारांचं प्रतिमाहनन”

“मागील दोन वर्षांपासून अजित पवारांचं प्रतिमाहनन करून त्यांच्या विश्वासार्हतेवर प्रश्नचिन्ह उपस्थित केलं जात आहे. याला दुसरे कुणी जबाबदार नाहीत. महाविकासआघाडीतूनच असे प्रयत्न सुरू असतील,” असा आरोप बावनकुळेंनी केला.