“लोकसभेतील पराभवानंतर आम्ही…”, ईव्हीएममधील घोटाळ्याच्या आरोपांवर भाजपा नेतृत्त्वाची पहिली प्रतिक्रिया

चंद्रशेखर बावनकुळे विरोधकांना म्हणाले, “नांदेडची पोटनिवडणूक तुम्ही जिंकलात, आम्ही तिथे हरलो. जर ईव्हीएम हॅक करून मतं घेता आली असती तर आम्ही नांदेड लोकसभेतही तशी मतं घेतली नसती का? खरंतर हा विरोधकांचा खोटारडेपणा आहे. ते हरले आहेत. परंतु, पराभव स्वीकारत नाहीत. मला असं वाटतं की त्यांनी त्यांचा पराभव स्वीकारावा आणि आत्मचिंतन करावं. लोकसभा निवडणुकीतील पराभवानंतर आम्ही आत्मचिंतन केलं होतं. त्या पराभवातून आम्ही शिकलो. लोकसभा निवडणुकीत आम्हाला जे अपयश आलं, त्यानंतर आम्ही काही नव्या गोष्टी शिकलो. त्या पराभवानंतर आम्ही आत्मचिंतन केलं. पुढे काय करायचं ते ठरलं. रणनीती ठरली. आम्ही प्रत्येक बूथवर जाऊन काम केलं. मतदान केंद्रांवर जाऊन जनतेला भेटलो. त्यानंतर मतदानाचं प्रमाण देखील वाढलं.

हे ही वाचा >> मुख्यमंत्रीपद मिळत नाही म्हणून शिंदे गटाने अजित पवारांना धरलं जबाबदार; रामदास कदम म्हणाले, “त्यांनी आमची…”

विरोधकांना झोप लागलेली नाही : बावनकुळे

भाजपा प्रदेशाध्यक्ष बावनकुळे म्हणाले, लोकसभा निवडणुकीच्या तुलनेत विधानसभा निवडणुकीत लोकांनी भरभरून मतदान केलं. मतदान केंद्रांवर मतदानाचे प्रमाण वाढलेलं दिसलं. त्यामुळे लोकसभा निवडणुकीच्या तुलनेत विधानसभा निवडणुकीच्या निकालावर प्रभाव पडला. परंतु, विरोधक जे काही बोलत आहेत तो त्यांचा खोटारडेपणा आहे. मला असं वाटतं दोन-चार दिवस त्यांना झोप लागणार नाही. जेव्हा त्यांची झोप लागेल, त्यानंतर त्यांचे डोक शांत राहील.