Chhagan Bhujbal : छगन भुजबळ यांचं वक्तव्य, “स्वारगेटची बलात्काराची घटना अत्यंत लांछनास्पद, पोलीस…”

पुण्यात नेमकी घटना काय घडली?

पुण्यातून फलटणच्या दिशेने प्रवास करणाऱ्या तरुणीवर स्वारगेट एसटी बस स्टँडवर बलात्कार करण्यात आला आहे. २५ फेब्रुवारी रोजी पहाटे साडेपाचच्या सुमारास ही घटना घडली. दरम्यान, पोलिसांनी या प्रकरणी गुन्हा दाखल केला असून सीसीटीव्ही फुटेजच्या आधारे आरोपीची ओळख पटवली आहे. आरोपीच्या शोधासाठी १३ पथकं तयार करण्यात आली आहे. छगन भुजबळ यांनी लवकरच पोलीस आरोपीला अटक करतील अशी प्रतिक्रिया देत ही घटना दुर्दैवी आहे असं म्हटलं आहे.

काय म्हणाले छगन भुजबळ?

“मी वर्तमानपत्रातून पुणे बलात्काराची घटना वाचली. ही घटना अत्यंत धक्कादायक आहे. महाराष्ट्राच्या पोलिसांवर माझा पूर्ण विश्वास आहे. ते आरोपीला शोधून काढतील आणि अटक करतील. सरकारही या सगळ्या गोष्टींमध्ये काळजीपूर्वक आदेश देतं आहे. मात्र पुणे बलात्काराची घटना लांछनास्पद आहे. कसं झालं? काय झालं ? याची चौकशी सुरु आहे. इतर अनेक गोष्टी त्या ठिकाणी सापडल्या आहेत. याआधीही असं काही घडलं आहे का? जर होत असेल तर लोक गप्प कसे बसले? पोलीस गप्प बसले? याची चौकशी झाली पाहिजे ही सगळ्यांचीच मागणी आहे.” असं छगन भुजबळ यांनी म्हटलं आहे.

उपमुख्यमंत्री अजित पवार यांनी काय म्हटलं आहे?

महाराष्ट्रात ही अशी दुर्दैवी घटना घडणं अतिशय क्लेशदायक आहेत, याबद्दल कोणाचंच दुमत असण्याचे कारण नाही. पण आपण सर्व काळजी घेण्याचा प्रयत्न करतोय, तरी या घटना घडत आहेत. सर्व सीसीटीव्हीची बारकाईने पाहणी करायला सांगितली आहे. तिथे सीसीटीव्हीत प्रवासीही दिसत आहेत. स्वारगेट आणि शिवाजीनगर या बस डेपोत ठिकाणी वर्दळ असते. काहीही करुन तो आरोपी सापडला पाहिजे. त्याला फाशीची शिक्षा झाली पाहिजे. ज्या मुलीवर हा प्रसंग उद्भवला आहे त्या मुलीच्या बाबतीत ज्या काही गोष्टी करायची आहे ते करण्याच्या सूचना दिल्या आहेत. मी त्या जिल्ह्याचा पालकमंत्री असल्याने मलाही ती गोष्ट ऐकल्यानंतर अतिशय मनस्ताप झाला, असेही अजित पवार म्हणाले.