‘या’ अफवांमुळे झाला छत्रपती संभाजीनगरमध्ये राडा ! SIT च्या तपासात माहिती समोर

छत्रपती संभाजीनगर या ठिकाणी झालेल्या राडा प्रकरणात माहिती समोर आली आहे. दगडफेक आणि जाळपोळीच्या घटनांना फक्त या अफवाच कारण आहेत असंही समोर आलं आहे. सुरूवातीला दोन गटांमध्ये किरकोळ वाद झाला होता. पोलिसांनी या वादात हस्तक्षेप करत हा वाद मिटवला होता. मात्र त्यानंतर काही लोकांनी सोशल मीडियावरुन अफवा पसरवल्या आणि त्यामुळे मोठा जमाव किराडपुरा या ठिकाणी जमा झाला. “एका गटाच्या तरुणांना नाहक मारण्यात आले आहे, मारेकऱ्यांना पोलिसांनी मंदिरात लपवून ठेवले आहे आणि शहागंजमध्ये दंगल उसळली आहे,” यासह इतर अफवा पसरल्यानेच जमाव जमा झाल्याचे समोर आले आहे. त्यामुळे आता अफवा पसरवणाऱ्या लोकांचा शोध पोलीस घेत आहेत.

रामनवमीच्या आदल्या दिवशी झालेल्या राड्याला २५ दिवस पूर्ण

रामनवमीच्या आदल्या दिवशी झालेल्या राड्याला २५ दिवस पूर्ण झाले आहेत. या घटनेला २५ दिवस उलटले आहेत. पोलिसांकडून आता फरार आरोपींचा शोध घेतला जातो आहे. विशेष तपास पथकाने या प्रकरणात आत्तापर्यंत ७९ हल्लेखोरांना ताब्यात घेतलं आहे आणि अटकही केली आहे. तसंच इतर फरार आरोपींचा शोध पोलिसांकडून घेतला जातो आहे. घटनास्थळी आढळलेल्या सीसीटीव्ही फुटेजचा आधार घेऊन पोलीस आणि विशेष तपास पथक या प्रकरणी इतर हल्लेखोरांचा शोध घेत आहेत. एबीपी माझाने या संदर्भातलं वृत्त दिलं आहे.

काय आहे प्रकरण?

छत्रपती संभाजीनगरमध्ये रामनवमीच्या आदल्या रात्री दोनच्या दरम्यान दोन गटात झालेल्या दंगलीत अनेक गाड्यांची जाळपोळ झाली. जमावाला नियंत्रित करण्यासाठी पोलिसांना गोळीबार व अश्रुधूर नळकांड्याचा वापर करावा लागला. या जमावाने त्या रात्री पोलिसांच्या गाड्याही जाळल्या आहेत. शहरातील किराडपुरा भागात ही दंगल झाली होती. राम मंदिराजवळ तरुणांमध्ये आधी बाचाबाची झाली त्यानंतर दगडफेक करण्यात आली. पुढे जाळपोळ आणि हाणामारी सुरूच होती. ज्यानंतर या प्रकरणावरून राजकारणही तापलं होतं.