Shiv Jayanti 2025 Highlights : रायगडावर पोहोचल्यावर विकी कौशलची पहिली प्रतिक्रिया; म्हणाला, “माझं नेहमीच एक स्वप्न होतं की..”

छत्रपती शिवाजी महाराज यांच्या जयंतीनिमित्त आज छावा चित्रपटात संभाजी महाराजांची भूमिका साकरणारा बॉलिवूड अभिनेता विकी कौशल यांने रायगडावर छत्रपती शिवरायांचे दर्शन घेतले. यावेळी रायगडावर माध्यमांशी बोलताना विकी म्हणाला की, "मी स्वत:ला खूपच भाग्यशाली समजतो की मला येथे येण्याची संधी मिळाली. छत्रपती शिवाजी महाराज यांच्या जयंतीच्या सर्वांना शुभेच्छा. माझं नेहमीच एक स्वप्न होतं की येथे यावं आणि शिवरायांचं दर्शन घेण्याची संधी मिळावी आणि आज आशीर्वाद घेतल्यानंतर खूप चांगलं वाटत आहे".

"मी छत्रपती संभाजी महाराज यांची भूमिका साकारावी हे माझं भाग्य आहे. लोकांचं प्रेम पाहून खूप चांगलं वाटत आहे. आज जे आहे ते सगळं छत्रपती शिवाजी महाराज यांच्यामुळे आहे. त्यांच्या जयंतीच्या सर्वांना शुभेच्छा," असेही विकी कौशल यावेळी बोलताना म्हणाला.

संभाजी महाराज यांची जीवन साकारताना छत्रपती शिवाजी महाराज यांची भूमिका काय होती? या प्रश्नाला उत्तर देताना विकी म्हणाला की, "माझ्या मते फक्त छत्रपती संभाजी महाराज यांचे जीवन साकारण्यात नाही तर देशभरातली प्रत्येक तरुणाचं जीवन साकारण्यामध्ये छत्रपती शिवाजी महाराज यांची भूमिका आपण लक्षात ठेवली पाहिजे. कारण त्यावेळी देशातील पहिले रयतेचे राजा होते. ते रयतेसाठी लढले आणि त्यांच्यासाठीच जगले. आजही आपल्याला त्यांच्याकडून प्रेरणा मिळते. आजही आपण जे सरकार पाहातो त्या सगळ्याची सुरूवात इथून होते".

छावा चित्रपटात छत्रपती संभाजी महाराज यांची भूमिका साकारणारा अभिनेता विकी कौशल आज छत्रपती शिवाजी महाराज यांच्या जयंतीनिमित्त रायगडावर दाखल झाला. यावेळी चित्रपटाचे दिग्दर्शक लक्ष्मण उत्तेकर हे देखील उपस्थित होते.

शिवजयंतीच्या निमित्ताने मालवण मधील सिंधुदुर्ग किल्ल्यावर माजी आमदार वैभव नाईक हे शेकडो शिवभक्तांसह शिवराजेश्वर मंदिरात जिरे टोप व पुष्पहार अर्पण करीत नतमस्तक झाले. यावेळी त्यांनी राज्यातील शिवप्रेमींना शुभेच्या दिल्या. ज्या प्रमाणे शिवरायांनी सर्वांना एकत्र केलं त्याप्रमाणेऊ राज्यातील मराठी माणसांना एकत्र घेऊन राज्यात महाराष्ट्रात शिवरायांच्या विचाराचे राज्य स्थापन व्हावं अशी प्रार्थना केली.

अकोल्यात छत्रपती शिवाजी महाराज यांच्या 395व्या जयंती निमित्त शहरामधून जय शिवाजी जय भारत ही पदयात्रा काढण्यात आली आहे. तर या पदयात्रेत शहरातील शालेय विद्यार्थी सह शासकीय अधिकाऱ्यांनी मोठ्या प्रमाणात सहभाग घेतला होता. तर या रॅलीला वसंत देसाई स्टेडियम येथून सुरुवात होऊन ही रॅली टिळक रोड, सिटी कोतवाली चौक, सरकारी बगीचा मार्गे जिल्हाधिकारी कार्यालय या ठिकाणी या रॅलीचा समारोप करण्यात आला आहे.

जगभरातील शिवप्रेमींना छत्रपती शिवरायांच्या जन्मोत्सवाच्या मनापासून शुभेच्छा. आजपासून पाच वर्षांनी छत्रपती शिवरायांचा ४००वा जन्मोत्सव आपण साजरा करणार आहोत. शिवनेरीवरती आल्यावर आपल्याला जी स्वराज्याची स्फूर्ती मिळते ते घेऊन महाराष्ट्राची सेवा करण्यासाठी आम्ही सर्व लोक येथे येत असतो, असे मुख्यमंत्री देवेंद्र फडणवीस शिवनेरी किल्ल्यावर आयोजित कार्यक्रमात बोलताना म्हणाले.

छत्रपती शिवाजी महाराज केवळ एक योद्धा नव्हते तर एक चांगले प्रशासक देखील होते. आम्ही त्यांच्या सर्व किल्ल्यांचा विकास करू. आम्ही छत्रपती शिवाजी महाराज यांच्या सर्व किल्ल्यांवरील अतिक्रमण हटविण्यासाठी एक टास्क फोर्स स्थापन केली आहे, असेही फडणवीस यांनी यावेळी सांगितले.

"छत्रपती शिवरायांचे किल्ले हे आमच्यासाठी कोणत्याही मंदिरापेक्षा मोठे आहेत. म्हणून या किल्ल्यांचं संवर्धन झालं पाहिजे. स्वराज्याची राजधानी रायगड येथे अनेक कामे आपण सुरू केले आहेत. मला सांगताना आनंद वाटतो की आपण एक टास्क फोर्स तयार केला आहे. शिवाजी महाराजांच्या किल्ल्यावरील सगळी अतिक्रमण काढून टाकण्याचा निर्णय आपण घेतला आहे. काही झालं तरी अतिक्रमणं तिथं राहाणार नाहीत" असे मुख्यमंत्री देवेंद्र फडणवीस म्हणाले.

"महाराष्ट्रातील गडकिल्ले छत्रपती शिवाजी महाराज यांच्या स्वराज्याची खऱ्या अर्थाने दौलत आहेत. हे गड किल्ले आपले शक्तीस्थान, स्फूर्तीस्थान आहेत. त्यामुळे या गडकिल्ल्यांचा विकास करण्यासाठी महायुतीच्या आघाडी सरकारकडून विशेष प्रयत्न सुरू आहेत. शिवजन्मभूमी शिवनेरीच्या जतन, संवर्धनासाठी मी मुख्यमंत्र्‍यांच्या साक्षीने सांगतो की त्यांनी आम्हाला सूचना केल्या आहेत की या संवर्धनासाठी निधीची कोणतीही कमतरता आपल्याला भासू द्यायची नाही. हा देखील शब्द मी राज्याचा अर्थमंत्री या नात्याने मुख्यमंत्री, उपमुख्यमंत्र्‍यांच्या साक्षीने देतो," असे उपमुख्यमंत्री अजित पवार हे शिवनेरी येथील शिवजयंती सोहळ्यादरम्यान म्हणाले.

"छत्रपती शिवाजी महाराजांना त्यांच्या जयंतीनिमित्त मी आदरांजली वाहतो. त्यांच्या पराक्रमी आणि दूरदर्शी नेतृत्वाने स्वराज्याचा पाया घातला, पिढ्यांना धाडस आणि न्यायाच्या मूल्यांचे पालन करण्यास प्रेरित केले. ते आपल्याला एक मजबूत, स्वावलंबी आणि समृद्ध भारत निर्माण करण्यास प्रेरित करतात," अशी पोस्ट पंतप्रधान नरेंद्र मोदी यांनी सोशल मिडिया प्लॅटफॉर्म एक्सवर पोस्ट केली आहे. याबरोबरच प्रंतप्रधान नरेंद्र मोदी यांनी त्यांच्या आवाजातील एक व्हिडीओ देखील पोस्ट केला आहे.

वसई येथे छत्रपती शिवाजी महाराजांची ३९५ वी जयंती 'जय शिवाजी-जय भारत' पदयात्रा काढून साजरी करण्यात आली, ज्यात हजारो लोक सहभागी झाले होते. भाजप आमदार स्नेहा दुबे पंडित यांनी शिवाजी महाराजांच्या पुतळ्याला पुष्पहार अर्पण केला आणि झाडे लावली. या कार्यक्रमात महानगरपालिका अधिकाऱ्यांचा सहभाग होता आणि सांस्कृतिक कार्यक्रमांचे आयोजन करण्यात आले होते.

शिवसेना (ठाकरे) पक्षाचे नेते अंबादास दानवे यांना सुद्धा प्रेक्षक म्हणून या मुलांची प्रात्यक्षिके बघत असताना साहसी खेळाचा मोह आवरला नाही. शिवसेना - उद्धव बाळासाहेब ठाकरे पक्षाचे उपशहरप्रमुख जयसिंग होलिये यांच्यासह अंबादास दानवे यांनी तलवारबाजीचे प्रात्यक्षिक दाखवले. अत्यंत मुरब्बी मावळ्याप्रमाणे दानवे यांनी तलवार चालवली. यावेळी जय भवानी, जय शिवाजी... हर हर महादेव.. जय घोष करत मराठेकालीन साहसी खेळांचे प्रात्यक्षिके दाखविण्यात आली. शिवसेना - उद्धव बाळासाहेब ठाकरे पक्ष संभाजीनगरच्या वतीने सदरील सोहळ्याचे आयोजन करण्यात आले होते. नारळ फोडून या मराठेकालीन साहसी खेळास सुरुवात करण्यात आली. नालासोपारा येथील वीर शिवबा नावाने प्रचलित मराठा सैनिकी आखाडा आणि शिवकालीन शस्त्राचे प्रशिक्षण संस्थेने ही प्रात्यक्षिके सादर केली.