ठाकरे गटाचे सर्वेसर्वा उद्धव ठाकरे आज अहमदगनर दौऱ्यावर असून त्यांनी आज शेतकऱ्यांशी संवाद साधला. पावसाने ओढ दिल्याने शेतकरी चिंतातूर झाला असून त्यांना आता विमा आणि नुकसानभरपाईची प्रतिक्षा आहे. दरम्यान, या सर्व पार्श्वभूमीवर उद्धव ठाकरे यांनी मुख्यमंत्री एकनाथ शिंदे यांच्यावर हल्लाबोल केला आहे.
हेही वाचा >> “शेतकऱ्यांवर अस्मानी नाहीतर सरकारची सुल्तानी…”, पीकविमा आणि नुकसानभरपाईसाठी ठाकरेंचा सरकारवर हल्लाबोल
“सरकार फक्त दारोदारी फिरत असून आराम करायला हेलिकॉप्टरने शेतात जात आहेत”, अशी टीका उद्धव ठाकरेंनी केली. ते पुढे म्हणाले की, “त्यापेक्षा त्यांनी हेलिकॉप्टरने त्यांच्या शेतात यावं, म्हणजे खरा शेतकरी काय असतो हे कळेल. पंचतारांकित यांची (एकनाथ शिंदेंची) शेती असेल. पण माझा शेतकरी साधा भोळा आहे आणि अन्नदाता आहे. अन्नदात्याचे आशीर्वाद घ्यायला पाहिजे. कारण अन्नदात्याचे शाप फार वाईट असतात. तो कोणाला भोगायला लागू नयेत असं मला वाटतं”, असंही ते पुढे म्हणाले.
“एक रुपयात विमा देतात, पण अर्ज भरण्यात किती रुपये जातात हे कोणी पाहत नाही. या योजनेचा फायदा शेतकऱ्यांना न होता मित्रमंडळांच्या विमा कंपन्यांना होत असेल तर हा भ्रष्टाचार लोकांसमोर आलेला नाही असं समजू नका”, असंही ठाकरे म्हणाले.
हेही वाचा >> “…म्हणून पोलिसांनी लाठीमार केला”, दीपक केसरकर यांचं मोठं वक्तव्य; म्हणाले, “मराठा समाजाने…”
विशेष अधिवेशात मराठा, धनगर, ओबीसीच्या मागण्या सत्कारणी लावाव्यात. दिल्लीबाबतचा निकाल संसदेच्या खासगी बहुमताने फिरवला. त्यामुळे या समाजासाठीही निर्णय घ्यावा, असंही ठाकरे म्हणाले.
हे तिडमागडं सरकार
“काल मी असं ऐकलं की वीमा कंपन्यांना २५ टक्के रक्कम देता येतेय का ते पाहा, असं सरकारने सांगितलं आहे. पण २५ टक्के कुठून काढलंत आपण. १०० टक्के नुकसान झाल्याचं दिसतंय, तिथे पंचनामे कधी करणार? पाऊस लागला तर सरकार म्हणेल की पाऊसच पाऊस चहुकडे. अशा परिस्थितीत सरकार आपल्या दारी आणि दुष्काळ उरावरी अशी परिस्थिती आहे. हे तिडमागडं सरकार आहे. तीन तिघाडा काम बिघाडा सरकार आहे. कार्यक्रम, जाहिराती जोरात करतंय. जाहिरांतीवर पैसे खर्च करण्यापेक्षा शेतकऱ्यांच्या हक्काचे पैसे दिले तर बरं होईल”, अशी टीकाही त्यांनी केली.
