“अनिल देशमुखांचं जे झालं तेच अजित पवार आणि अनिल परबांचं होईल” – चंद्रकांत पाटील

माध्यमांशी बोलताना त्यांनी या पत्रातल्या मागण्या आणि पत्राचा उद्देश स्पष्ट केला आहे. बेकायदेशीरपणे पैसे वसुली हाच राज्य सरकारचा कारभार असल्याचंही त्यांनी म्हटलं आहे. महाराष्ट्राच्या जनतेचा कायद्यावरचा विश्वास उडत चालला आहे, ह्याची दखल केंद्रीय गृहमंत्र्यांनी घ्यावी असंही पाटील म्हटले.

Disclosures made by Mumbai Police ASI Sachin Waze regarding involvement of Ajit Pawar, Anil Parab & associates in large scale corruption are shocking & shameful. Through a letter, I have urged Union Home Minister Sh. Amit Shah ji to order a CBI enquiry against both ministers. pic.twitter.com/tKgeJkoVTv

— Chandrakant Patil (@ChDadaPatil) June 30, 2021

चंद्रकांत पाटील यांनी सचिन वाझे प्रकरणातल्या अनेक गोष्टी या पत्राच्या माध्यमातून गृहमंत्र्यांसमोर मांडल्या आहेत. सचिन वाझे याला २००४ सालीच निलंबित करण्यात आलं होतं. मात्र, २०२० मध्ये सध्याच्या महाविकास आघाडी सरकारने त्याला पुन्हा पोलीस दलात रुजू करुन घेतलं असा आरोपही त्यांनी केला आहे. त्याचबरोबर वाझे याने चौकशीदरम्यान राज्याचे उपमुख्यमंत्री अजित पवार यांनी दर्शन घोडावत यांच्या माध्यमातून त्याला बेकायदेशीर गुटखा विक्रेत्यांकडून तसंच उत्पादकांकडून १०० कोटी वसूल करण्यास सांगितलं असंही त्यांनी या पत्रात म्हटलं आहे.

हेही वाचा- अजित पवारांची सीबीआय चौकशी करा; चंद्रकांत पाटलांचं केंद्रीय गृहमंत्र्यांना पत्र

परिवहन मंत्री अनिल परब यांनी मुंबई महापालिकेच्या कंत्राटदारांकडून दोन कोटी रुपये वसूल करण्यास सांगितल्याचं वाझे याने चौकशीत उघड केलं आहे, असंही या पत्रात लिहिलेलं आहे. सचिन वाझेने दिलेल्या कबुलीजबाबात त्याने अजित पवार आणि अनिल परब यांनी आपल्याला वसुली करण्यास सांगितलं अशी माहिती दिली आहे. त्यामुळे या दोघांचीही सीबीआय चौकशी करण्यात यावी, अशी मागणी चंद्रकांत पाटील यांनी केंद्रीय गृहमंत्री अमित शाह यांच्याकडे केली आहे.