राज ठाकरेंसोबतच्या भेटीत काय चर्चा झाली? मनसेसोबत युती झाल्यास पुढील प्लॅन काय? CM शिंदे म्हणाले, “राज ठाकरेंवर जेव्हा…”

मुख्यमंत्री शिंदे व उपमुख्यमंत्री देवेंद्र फडणवीस यांनी १ सप्टेंबर रोजी दुपारी रिलायन्स उद्योगसमुहाचे मुकेश अंबानी यांच्या निवासस्थानी गणेशाचे दर्शन घेतले. त्यानंतर शिंदे यांनी मनसेचे प्रमुख राज ठाकरे यांच्या दादरमधील ‘शीवतीर्थ’ निवासस्थानी गणेशाचे दर्शन घेण्यासाठी भेट दिली. यावेळी शिंदे गटातील स्थानिक आमदार सदा सरवणकर, मनसेचे बाळा नांदगावकर, नितीन सरदेसाई आदी उपस्थित होते. याच भेटीसंदर्भात मुख्यमंत्री शिंदे यांना टीव्ही ९ च्या मुलाखतीमध्ये प्रश्न विचारण्यात आला.

“तुम्ही राज ठाकरेंना भेटले. या भेटीत राजकीय चर्चा झाली अशा सर्वत्र बातम्या आल्या. नक्की काय झालं या भेटीत आणि मनसे तुमच्याबरोबर आल्यास तुमचा पुढील प्लॅन काय असेल?” असा प्रश्न शिंदे यांना या मुलाखतीमध्ये विचारला गेला. त्यावर उत्तर देताना शिंदेंनी, “तुम्हाला खरं सांगू का, राज ठाकरेंवर जेव्हा शस्त्रक्रीया झाली होती त्यावेळेस देखील मी सदिच्छा भेट म्हणून प्रकृतीची विचारपूस करण्यासाठी जाणार होतो. मात्र सगळे दौरे आणि इतर कारणांमुळे ते राहून गेलेलं होतं. त्यामुळे गणपती उत्सव होता. म्हणून गपणती दर्शनाला गेलेलो. त्यांची सदिच्छा भेटही घेतली,” असं शिंदे म्हणाले.

तसेच, “प्रत्येकवेळी काय भेटीमध्ये राजकारण किंवा राजकारणावर चर्चा झाली असं काही नव्हतं. राजकीय भेट नव्हती सदिच्छा भेट होती,” असंही शिंदेंनी उत्तर देताना स्पष्ट केलं.