“अपने को क्या करना है तीर-कमान से, बालासाहाब से, अपना गुलाबरावही सब है”; जाहीर सभेत गुलाबराव पाटलांचं विधान

सिल्लोडमध्ये गुलाबराव पाटील यांनी केलेल्या भाषणामध्ये अनेकदा स्थानिक जनतेचं काम करणाऱ्या व्यक्तीच्या पाठीशी लोक उभे राहतात याबद्दल बोलत होते. यावेळी त्यांनी माजी मुख्यमंत्री उद्धव ठाकरे यांच्या गटाकडून होणाऱ्या टीकेचाही समाचार घेतला. उद्धव ठाकरे गटाचे खासदार संजय राऊत यांनी शिंदे गटाने केलेल्या बंडखोरीनंतर अनेकदा गुलाबराव पाटील हे पानटपरी चालवायचे असा उल्लेख केला होता. यावरुनच पानटपरी चालवायचा त्याला आम्ही आमदार केलं अशी टीका झाल्याचा संदर्भ देत गुलाबराव पाटलांनी, “३ लाख ८० हजार मतांचा मतदारसंघ आहे. तुम्ही दिसायलाही वाईट नाहीत फार छान दिसता. एकाने विचारलं लोक तुम्हाला का निवडून देतात? कोणत्याही पक्षाने तिकीट दिलेलं असो पण ५० टक्के हे उमेदवारावरही असतं,” असं म्हटलं.

नक्की वाचा >> “मुंबई पालिकेच्या निवडणुका लवकर लागल्या तर निवडणूक आयोगाला…”; ‘धनुष्यबाणा’संदर्भात उज्ज्वल निकम यांचं मोठं विधान

तसेच पुढे बोलताना गुलाबराव पाटील यांनी अनेक मुस्लीम आपल्याला काम पाहून मतदान करतात असं म्हटलं. जळगाव ग्रामीण मतदारसंघाचं प्रतिनिधित्व करणाऱ्या गुलाबराव पाटील यांनी मतदारसंघातील ९० टक्के मुस्लीम हे आपल्याला काम पासून मत देतात असं म्हटलं आहे. “मी ज्या मतदारसंघातून निवडून येतो तिथं ९० टक्के मुस्लिम मला मतं देतात. ते म्हणतात, अपने को क्या करना है तीर कमान से, बालासाहाब से, शरद पवार से, सोनिया गांधी से अपना गुलाबरावही सब है,” असंही गुलाबराव पाटील यांनी भाषणात म्हटलं.