मनपा निवडणुकीत दोन्ही काँग्रेसची आघाडीच व्हावी- आदिक

शहरात कोणी तलवार घेऊन फिरत नाही की कोणी खून करत फिरत नाही, मग संरक्षणाची आवश्यकताच काय, असा प्रश्न उपस्थित करून पाचपुते म्हणाले, नगरच्या लोकांना वाटत नाही का विकास व्हावा, शहर आहे तसेच ठेवण्याचा प्रयत्न आमदार करतात तरीही पाच वेळा विजयी होतात, याला कारण आपण सक्षम पर्याय न देता भांडत बसतो. दोन्ही पक्षांत सर्वजण स्वत:चा स्वार्थ पाहतात, आघाडी किंवा पक्षाचा स्वार्थ कोणी पाहात नाही. केवळ एक उड्डाणपुलाचा प्रश्न सोडला तर पाणी योजनेसाठी ११६ कोटी रुपये दिले, भुयारी गटार योजना मंजूर केली, सीना नदीच्या सुशोभीकरणासाठी पैसा दिला, तो वाया घालवला, नाटय़गृह व अतिक्रमणे हटवतानाही लोकप्रतिनिधीच आडवे पडतात हे आपण लोकांपर्यंत पोहोचवले पाहिजे.
कळमकर म्हणाले, आघाडीचा निर्णय दोन्ही पक्षांचे श्रेष्ठी घेतील. आघाडी करताना दोन्ही पक्षांनी फार अवास्तव मागण्या करू नयेत, नाहीतर स्वतंत्र लढून नंतर एकत्र यावे. आपल्या भांडणात युतीचा फायदा होतो. संग्राम जगताप यांनी काही दिवसांपूर्वी पक्षनिरीक्षकांच्या बैठकीत बहुतेकांनी आघाडी करण्यास अनुकूलता दाखवली. परंतु चार महिन्यांपूर्वी श्रेष्ठींनी स्वबळावर तयारी करण्यास सांगितले होते, त्यामुळे आघाडी करायची की नाही, हे प्रथम स्पष्ट झाले पाहिजे, असे सांगितले. शहराचे चित्र बदलण्यासाठी तेच तेच उमेदवार देण्याऐवजी नव्या कार्यकर्त्यांना संधी मिळावी, काही प्रतिष्ठित लोकांना जाणीवपूर्वक उमेदवारी दिली जावी, अशी सूचना केली. राजेंद्र फाळके, संपत मेमाणे, महिला जिल्हाध्यक्ष डॉ. मेधा कांबळे आदींची भाषणे झाली.
 काँग्रेस पदाधिका-यांची हजेरी
राष्ट्रवादीच्या मेळाव्यास काँग्रेसमधील आदिक समर्थक विनायक देशमुख, डी. एम. कांबळे, उबेद शेख आदी उपस्थित होते. काँग्रेसची शहरात चांगली अवस्था नसताना स्वबळाची भाषा कशाच्या जोरावर केली जाते, याचे आश्चर्य वाटते, असा प्रश्न उपस्थित करून देशमुख म्हणाले, की दोन्ही काँग्रेस एकमेकांची स्पर्धक नाहीतर खरी स्पर्धक युती आहे, हे लक्षात घेऊन आघाडी केली पाहिजे. कांबळे यांनीही मनसेमुळे सेनेच्या आमदाराची ही शेवटचीच निवडणूक असेल, त्यामुळे दोन्ही काँग्रेसने एकत्रच निवडणूक लढवावी, असे सांगितले. शेख यांनीही आघाडीचा निर्णय श्रेष्ठींनी लवकर घ्यावा, असे आवाहन केले.