पंतप्रधान नरेंद्र मोदी आणि अनिल अंबानी यांची नार्को टेस्ट करा-काँग्रेस

घर-घर मोदी हा नारा देणारे नरेंद्र मोदी आता डर डर मोदी आणि थर थर मोदी झाले आहेत अशीही टीका सचिन सावंत यांनी केली. राफेल प्रकरणात सर्वोच्च न्यायालयाने मोदी सरकारला क्लीन चिट दिली, कारण खोटं बोलून न्यायालयाची दिशाभूल करण्याचे काम या सरकारने केले आहे. संसदेच्या विशेष अधिकाराचे उल्लंघनही मोदी सरकारने केले आहे. राफेल घोटाळा हा देशाचे नुकसान करणारा, देशाची सुरक्षा धोक्यात आणणारा आणि देशाचे नुकसान करणारा घोटाळा आहे. हा घोटाळा फक्त मोदींच्या मित्रमंडळींसाठी फायद्याचा ठरला आहे अशीही टीका सचिन सावंत यांनी केली.

राफेल प्रकरणात पंतप्रधान नरेंद्र मोदी यांनी खासगी कंपनीचे मध्यस्थ म्हणून काम केल्याचे सिद्ध झाले आहे. यासाठी त्यांनी सर्वोच्च न्यायालयात चुकीचे प्रतिज्ञापत्र दाखल करुन सर्वोच्च न्यायालयाचा अवमान केला आहे. मोदी यांना जनतेच्या न्यायालयातच शिक्षा होईल, यासाठी राफेल घोटाळा प्रकरणाचा पर्दाफाश करण्यासाठी येत्या काळात जनतेत जाऊन पाठपुरावा करणे, प्रबोधन करणे, पत्रकार परिषदा आयोजित करणे, आंदोलन करणे याद्वारे काँग्रेस पक्ष कार्यरत राहील, असे सचिन सावंत यांनी सांगितले.