सांगली : निष्ठावंतांवर अन्याय आणि बंडखोरांना पायघड्या ही कसली संस्कृती, असा सवाल करीत काँग्रेस कार्यकर्त्यांनी पक्ष निरीक्षकांसमोर महापालिका निवडणुकीत एका गटाचे नगरसेवक निवडून येतील, पण काँग्रेसला सत्ता मिळणार नाही असा इशारा दिला.
काँग्रेसचे पक्ष निरीक्षक आणि प्रदेश सरचिटणीस माजी आमदार रामहरी रूपनवर यांनी पक्षकार्याचा आढावा घेण्यासाठी बैठक बोलावली होती. यावेळी कार्यकर्त्यांची मते जाणून घेतली. यावेळी कार्यकर्त्यांनी आपल्या भावना व्यक्त केल्या. प्रारंभी बिपीन कदम यांनी स्वागत केले. तर प्रास्ताविक शहर जिल्हाध्यक्ष पृथ्वीराज पाटील यांनी केले.
यावेळी सांगलीत पृथ्वीराज पाटील यांचा पराभव केवळ बंडखोरीमुळे झाल्याची सल बोलून दाखवली. या बंडखोरांवर कारवाई करण्याची शिफारस पक्षाच्या वरिष्ठ नेत्यांकडे करणार का, असा सवाल उपस्थित केला. बंडखोर उमेदवाराचा प्रचार केलेल्यांना महापालिका उमेदवारी देऊ नका अन्यथा एका गटाचे नगरसेवक निवडून येतील पण सत्ता मात्र काँग्रेसची महापालिकेत येणार नाही, असे भाकित कार्यकर्त्यांनी व्यक्त केले.
अय्याज नायकवडी, आशिष कोरी, अनिल मोहिते, ॲड. अमोल चिमाण्णा, राजेंद्र कांबळे, बिपीन कदम, डी. पी. बनसोडे, प्रकाश बरडोले, भारती भगत, सनी धोतरे यांनी तर काँग्रेसचे गटबाजी करणारे नेतेच काँग्रेस संपवत आहेत असे सांगून काँग्रेस पक्ष कोण संपवत आहेत याची जंत्रीच मांडली.
कार्यकर्त्यांचे ऐकून घेतल्यानंतर श्री. रूपनवर म्हणाले, काँग्रेसचा पराभव करणे म्हणजे लोकशाहीचा पराभव आहे. महाराष्ट्र प्रदेश काँग्रेस कमिटीचे नूतन अध्यक्ष आमदार हर्षवर्धन सपकाळ यांनी पक्ष संघटन मजबूत करण्यासाठी विशेष बैठकांचे सत्र आयोजित केले आहे. मरगळ झटकून कामाला लागा, येणाऱ्या महापालिका, जिल्हा परिषद आणि पंचायत समितीच्या निवडणुका आपल्याला जिंकायच्या आहेत. बूथ यंत्रणा सक्षम करुया. सकारात्मक प्रतिसाद दिला तर काँग्रेस सत्तेवर येईल. सांगलीत जे घडले त्या वस्तुस्थितीचा अहवाल प्रदेश काँग्रेस कमिटीला दिला जाईल.
पक्ष निरीक्षकांनी बोलावलेल्या या बैठकीस अजिजभाई मेस्त्री, प्रा. एन.डी.बिरनाळे, ॲड्. ए.ए. काझी, अल्ताफ पेंढारी, आनंदराव पाटील, अशोकसिंग रजपूत, आदी प्रमुख कार्यकर्ते उपस्थित होते.
