आता ५०० रुपयांत होणार करोना टेस्ट! खासगी प्रयोगशाळांमधील दर झाले कमी!

राज्यात खासगी प्रयोगशाळांमध्ये करण्यात येणाऱ्या कोरोना चाचण्यांचे दर पुन्हा एकदा सुधारित करण्यात आले असून आता कोरोना निदानासाठी करण्यात येणाऱ्या आरटीपीसीआर चाचणीसाठी 500 रुपये आकारण्यात येणार आहे.

— Rajesh Tope (@rajeshtope11) March 31, 2021

करोनाच्या चाचण्यांचे दर गेल्या काही महिन्यांमध्ये ४ हजार ५०० वरून ५ ते ६ टप्प्यांमध्ये कमी करत आता ५०० रुपयांपर्यंत कमी करण्यात आले आहेत. यापूर्वी राज्य शासनाने सप्टेंबर, ऑक्टोबर आणि डिसेंबर या महिन्यांमध्ये कोरोना चाचण्यांच्या दरांमध्ये सुधारणा करीत अनुक्रमे आधी १२००, मग ९८० आणि शेवटी ७०० रुपये असे दर करण्यात आले होते. हे दर संकलन केंद्रावर नमुना देऊन चाचणी करण्याचे होते. आज जाहीर करण्यात आलेल्या शासन निर्णयानुसार आता कोरोना चाचण्यांसाठी ५००,६०० आणि ८०० असे सुधारित दर निश्चित करण्यात आले आहेत. यामध्ये संकलन केंद्रावरुन नमुना घेऊन त्याची वाहतूक आणि अहवाल देणे या सर्व बाबींसाठी रुग्णाकडून ५०० रुपये आकारले जातील. रुग्णालय, कोविड केअर सेंटर, क्वारंटाईन सेंटर मधील प्रयोगशाळा येथून नमुना तपासणी आणि अहवाल यासाठी ६०० रुपये तर रुग्णाच्या निवासस्थानावरुन नमुना घेऊन त्याचा अहवाल देणे यासाठी ८०० रुपये आकारण्यात येणार आहेत.

रॅपिड अँटिजेन टेस्टचे दर देखील कमी झाले

आरटीपीसीआर चाचणीसोबतच रॅपीड अँटिजेन, अँटिबॉडीज या चाचण्यांसाठी दर निश्चित करण्यात आले आहे. हे दर अनुक्रमे रुग्ण स्वत: प्रयोगशाळेत आल्यास, तपासणी केंद्रावरुन अथवा एकत्रित नमुने घेतल्यास आणि रुग्णाच्या घरी जाऊन नमुने घेतल्यास अशा तीन टप्प्यांसाठी आकारण्यात येणार आहेत. अँटीबॉडीज (एलिसा फॉर सार्स कोविड) या चाचण्यांसाठी प्रत्येक टप्प्यानुसार अनुक्रमे २५०, ३०० आणि ४०० असे दर निश्चित करण्यात आले आहेत. सीएलआयए फॉर सार्स कोविड अँटीबॉडीज या चाचणीसाठी अनुक्रमे प्रत्येक टप्प्यानुसार ३५०, ४५० आणि ५५० असे दर निश्चित करण्यात आले आहेत. तर रॅपीड अँटीजेन टेस्टसाठी प्रत्येक टप्प्यानुसार १५०, २०० आणि ३०० असे दर आता निश्चित करण्यात आले आहेत.