सायबर गुन्ह्यांच्या घटनांमध्ये सध्या मोठ्या प्रमाणात वाढ झाल्याचे पाहायला मिळत आहे. सायबर गुन्हेगार हे ग्राहकांना वेगवेगळ्या प्रकारे फसवतात. अनेक प्रकरणे अशी आहेत की, सायबर गुन्हेगारांनी लोकांची फसवणूक करुन त्यांची बँक खाती रिकामी केली. आता मुंबईत एक अशीच घटना समोर आली आहे. एका कामगारने कंपनीला गंडा घालून तब्बल १ कोटी ८ लाख रुपयांची फसवणूक केली. मात्र, त्याने मिळविलेले हे १ कोटी ८ लाख रुपये ‘फ्रॉड स्कीम’मध्ये गमावले.
सायबर चोरटे नवीन नवीन शक्कल लढवत फसवणूक करताना आढळतात. या फसवणुकीला सर्वसामान्य बळी पडतात. कंपनीत लेखापाल म्हणून काम करणाऱ्या कर्मचाऱ्याने कंपनीचीच तब्बल १ कोटी ८ लाखांची फसवणूक केली. झैना इलेक्ट्रीक आणि मेकॅनिक वर्क या खासगी कंपनीत सुधीर मापुस्कर नावाचा व्यक्ती १९९२ पासून लेखापाल म्हणून काम करत होता. अनेक वर्षांपासून काम करत असल्यामुळे त्यांने कंपनीचा विश्वास संपादन केला. त्याने या विश्वासाचा फायदा घेत कंपनीच्या तीन बँक खात्यामधून मोठी रक्कम त्याच्या वैयक्तिक खात्यावर वळविली.
हेही वाचा : सांगली जिल्हा बॅंकेतील गैरव्यवहारातील ५० कोटींची जबाबदार निश्चितेचे आदेश
असे मुंबईतील आझाद मैदान पोलीस अधिकाऱ्यांनी दाखल केलेल्या आरोपपत्रात नमूद करण्यात आले आहे. या संदर्भातील वृत्त ‘टाईम्स ऑफ इंडिया’ने दिले आहे. या आरोपपत्रात नमूद करण्यात आले की, कंपनीच्या लेखापालने २०१६ ते मार्च २०२३ या कालावधित कंपनीची तब्बल १ कोटी ८ लाख रुपयांची फसवणूक केली. कंपनीच्या मालकाने दाखल केलेल्या तक्रारीत या लेखापालने कंपनीच्या कर्मचाऱ्यांचा भविष्य निर्वाह निधी आणि पगारामधून पैसे वळविले असल्याचे म्हटले आहे.
सदर गुन्ह्याची कबूली अटक करण्यात आलेल्या लेखापालाने दिली असल्याचे पोलिसांनी सांगितले आहे. गुन्ह्याची कबूली देताना लेखापालाने सांगितले, २०२१ मध्ये अनेकांनी आपल्याशी संपर्क साधल होता. यामध्ये एक आकर्षक ऑफर देण्यात आली होती. याच ऑफरच्या मोहाला बळी पडून आपण कंपनीत गैरव्यवहार केला. १ कोटी ८ लाख रुपये हे वस्तु सेवा कर, आयकर विभागाचा कर, भविष्य निर्वाह निधी आणि कर्मचाऱ्यांचा पगार अशा पद्धतीने हे पैसे आपण घेतले होते. मात्र, मला एका योजनेतून मला नफा मिळाला की कंपनीचा गैरफायदा करत घेतलेले पैसे आपण परत जेथे होते तेथे पाठविणार होतो, असे या लेखापालाने कबूल केले. दरम्यान, या सर्व प्रकरणात पोलिसांनी आरोपीला अटक केली असून या प्रकरणात १५ बँक खाते गोठवली आहेत.
