‘मागची दहा वर्षे ट्रेलर होता, पिक्चर अजून बाकी’, मोदींच्या तिसऱ्या टर्मबद्दल फडणवीस म्हणाले…

देवेंद्र फडणवीस आपल्या भाषणात म्हणाले, “पंतप्रधान नरेंद्र मोदी यांनी दोन दिवसांपूर्वीच दिल्लीतील राष्ट्रीय अधिवेशनात आपण तिसऱ्यांदा सरकार स्थापन करणार आहोत, हे सांगितलं. सरकार स्थापन करत असताना आमची प्रेरणा छत्रपती शिवाजी महाराज आहेत, असंही ते म्हणाले. छत्रपती शिवाजी महाराजांनी हिंदवी स्वराज्याची स्थापना केली. ते छत्रपती झाले, तरीही एकही दिवस ते घरी बसले नाहीत. त्यांनी राज्य भोगले नाही. राज्याभिषेक झाल्यानंतर दुसऱ्याच दिवशी ते स्वराज्याचा विस्तार करण्यासाठी बाहेर पडले. स्वर्गवासी होईपर्यंत छत्रपतींनी देशाची सेवा केली. त्याप्रमाणेच पंतप्रधान मोदींनीही भारताची सेवा करण्याचा संकल्प सोडला आहे.”

“विकसित भारत तयार करण्यासाठी आम्हाला तिसऱ्यांदा सत्ता हवी आहे. दहा वर्ष तुम्ही मोदींचे राज्य पाहिले. दहा वर्षात बदललेला भारत आणि जगात भारताची बदललेली प्रतिमा पाहिली. भारताचा आत्मसन्मान, स्वाभिमान, आत्माभिमान बदलताना आपण पाहिलं. एक मजबूत भारत आपण पाहिला. भारतामध्ये रस्ते, रेल्वे आणि विमानतळ झाले. भारतामधील गरीबाला कल्याणाच्या योजना मिळाल्या. घर, शौचालय, सिलिंडर मिळालं. भारताच्या तरुणाईला स्टार्टअपसाठी कर्ज मिळालं. अशा अनेक योजना मागच्या दहा वर्षात झाल्या. पुढील पाच वर्ष यापेक्षाही अधिक पटीने भारताची प्रगती होणार आहे”, असेही देवेंद्र फडणवीस यावेळी म्हणाले.