‘भरीव मदतीच्या तरतुदीशिवाय दुष्काळ जाहीर करणे ही फसवणूकच’

राज्यातील भीषण दुष्काळ पाहता नियमित उपाययोजनांसोबतच शेतकऱ्यांना तातडीने हेक्टरी ५० हजार रूपयांची मदत देण्याची तसेच यंदाचा खरीप वाया गेला असून, जमिनीत ओल नसल्याने रब्बीचा पेरा होणार नसल्याच्या पार्श्वभूमीवर खरीप २०१८ मध्ये घेतलेल्या पीक कर्जासह शेतकऱ्यांचे सगळे कर्ज सरसकट माफ करण्याची गरज होती. परंतु, सरकारने अशी कोणतीही भरीव मदत जाहीर न केल्यामुळे दुष्काळाची ही घोषणा केवळ फसवणूकच असल्याचे विरोधी पक्षनेत्यांनी सांगितले.

सध्याच्या भयावह परिस्थितीला तोंड देण्यासाठी दुष्काळाच्या नियमित उपाययोजनांचीही व्याप्ती वाढवण्याची आवश्यकता होती. दुष्काळग्रस्त कुटुंबांना अधिक दिलासा देण्यासाठी त्यांच्या पाल्यांचे केवळ शासकीयच नव्हे तर सर्वच खासगी व व्यावसायिक महाविद्यालयांमधील सर्व शुल्क देखील माफ करायला हवे, अशी मागणीही राधाकृष्‍ण विखे पाटील यांनी केली.