“आम्ही सर्व आमदारांनी एकनाथ शिंदेंना स्पष्ट सांगितलंय…”, दीपक केसरकरांनी सांगितलं शिवसेनेच्या बैठकीत काय झालं?

दीपक केसरकर म्हणाले, “एकनाथ शिंदे आज शपथ घेणार की नाही याबाबत ते स्वतःच सांगू शकतील. मात्र, काल आमची शिवसेना आमदारांची व नेत्यांची बैठक पार पडली. त्या बैठकीत आम्ही एकनाथ शिंदे यांना स्पष्ट सांगितलं आहे की तुम्हाला मंत्रिमंडळात यावं लागेल. तुम्ही उपमुख्यमंत्री पद स्वीकारायला हवं. आमचा देखील असा हट्ट आहे. आम्ही शिंदे यांना सांगितलं आहे की तुम्ही मंत्रिमंडळात नसाल तर आम्ही देखील मंत्री म्हणून शपथ घेणार नाही. मंत्रिमंडळात सहभागी होण्याबाबत एकनाथ शिंदे यांनी सकारात्मकता दर्शवली आहे”.

हे ही वाचा >> Devendra Fadnavis Oath : देवेंद्र फडणवीस यांच्या शपथविधीचं उद्धव ठाकरे, शरद पवारांना निमंत्रण; चंद्रशेखर बावनकुळे म्हणाले, “सगळ्यांनी…”

एकनाथ शिंदे हे नरेंद्र मोदी व अमित शाह यांचं ऐकतात : दीपक केसरकर

माजी शिक्षणमंत्री केसरकर म्हणाले, “एकनाथ शिंदे हे पंतप्रधान नरेंद्र मोदी व केंद्रीय गृहमंत्री अमित शाह यांचं ऐकतात. अडीच वर्षांपूर्वी त्यांनी देवेंद्र फडणवीस यांना संदेश दिल्यानंतर फडणवीस यांनी उपमुख्यमंत्री पदाची जबाबदारी स्वीकारली होती. त्याचप्रमाणे आता देखील तसं होऊ शकतं. मोदी व शाह यांचा एकनाथ शिंदे यांना तसा संदेश आल्यावर ते योग्य तो निर्णय घेतील. अडीच वर्षांपूर्वी जी स्थिती होती तशीच स्थिती आता पुन्हा एकदा निर्माण झाली आहे. मी पुन्हा एकदा सांगतो, एकनाथ शिंदे पंतप्रधान नरेंद्र मोदी व अमित शाह यांचं ऐकतात. आमचे पक्ष जरी वेगवेगळे असले तरी आमची तत्त्वं एकच आहेत, आमचा विचार एक आहे, आमचे नेतेही एकच आहेत. महाराष्ट्रात आमचे नेते एकनाथ शिंदे आहेत तर देशपातळीवर नरेंद्र मोदी व अमित शाह यांचं नेतृत्व आम्ही स्वीकारलं आहे. एकनाथ शिंदे यांच्यासह आम्ही सर्वच जण मोदी आणि शहांचं नेतृत्व मानतो”.